नेपाली हास्यव्यङ्ग्य अनलाइन पत्रिका

बोल लिखुरे नेता अब बोल
यही हो हाम्रो मौका पनि
अब उत्तरका नाकाहरू खोल ।

तराईका डोजरहरू
गाउँका ट्याक्टरहरू
सबै उत्तरतिर चलाऊ
रातदिन पहाड खनेर
उत्तरका नाकाहरू खोलाऊ ।

पदको लागि तिमी
कसैको कुकुर बन्नु हुन्न
सधैं आफ्नाे स्वार्थ हेर्नेलाई
अब मित्र भन्नु हुन्न
बृटिसले गरिदिएका थोत्रा सन्धिपत्र
अब सबै जलाऊ
हाम्रो लागि यो अवसर पनि
अब उत्तरका नाकाहरू खोलाऊ ।

जनताहरूलाई बोलाऊ
नेताहरूलाई बोलाऊ
राष्ट्र सेवकहरूलाई बोलाऊ
कमिला जस्तै लागेर
माहुरी जस्तै जागेर
रातारात उत्तरको नाका खुलाऊ ।

फेरि कुनै लालचमा नपरेर
अब दक्षिणलाई नढोक
अब उसलाई सलाम नठोक
रातारात पहाड छेडेर
अब उसलाई चक्मा दिनुपर्छ
राष्ट्रको लागि लड्नेलाई तक्मा दिनुपर्छ
देश टुक्राउन खोज्ने विभिषणलाई
बरु वार्तामा नबोलाऊ
यो एउटा मौका पनि हो
अब जसरी हुन्छ
उत्तरका नाकाहरू खेलाऊ ।

दाङ, हाल– काठमाडौं