नेपाली हास्यव्यङ्ग्य अनलाइन पत्रिका

ढुकुमुकु ढुकुमुकु कसको हात ? ओलीको ।
ढुकुमुकु ढुकुमुकु कसको हात ? प्रचण्डको ।
ढुकुमुकु ढुकुमुकु कसको हात ? सुशीलको ।
ढुकुमुकु ढुकुमुकु कसको हात ? गच्छदारको ।
ढुकुमुकु ढुकुमुकु कसको हात ? नेम्वाङको ।
ढुकुमुकु ढुकुमुकु कसको हात ? सभासद्को ।
ढुकुमुकु ढुकुमुकु कसको हात ? पहाडको ।
ढुकुमुकु ढुकुमुकु कसको हात ? तराईको ।
ढुकुमुकु ढुकुमुकु कसको हात ? नेपालको ।
ढुकुमुकु ढुकुमुकु कसको हात ? नेपालीको ।

मुड्कीले हान्दा भएन । खाँबोमा बान्दा नि भएन । लाठीले चुट्दा भएन । हाँडीमा भुट्दा नि भएन । बोरामा हाल्दा भएन । चाल्नीमा चाल्दा नि भएन । ढिकीमा कुट्दा भएन । जाँतोले पिस्दा नि भएन । सिस्नुले हान्दा भएन । लिस्नुमा लडाउँदा नि भएन । बल लाउँदा भएन । गल लाउँदा नि भएन । घुर्की लाउँदा भएन । पाखुरा सुर्किंदा नि भएन । सलाई कोर्दा भएन । टाउको फोर्दा नि भएन ।

कन्यो, कन्यो, कन्यो । यसपालि संविधानसभा बेस्सरी कन्यो । नेपालको
संविधान बन्यो ।

च्याँखे थाप्दा भएन । बाटो छेक्दा नि भएन । मान्छे उचाल्दा भएन । उचालेर पछार्दा नि भएन । छक्का हान्दा भएन । चौका छान्दा नि भएन । बहिष्कार गर्दा भएन । तिरस्कार गर्दा नि भएन । कुर्सी हानाहान गर्दा भएन । माइक तानातान गर्दा नि भएन । एक्लै बटारिँदा भएन । मिलेर लठारिँदा नि भएन । जुट मिलाउँदा भएन । गुट बनाउँदा नि भएन । सडक चर्काउँदा भएन । सिंहदरबार थर्काउँदा नि भएन ।

गर्यो, गर्यो, गर्यो । यसपालिको भुइँचालोले गर्नुसम्म गर्यो । नेपालमा संविधान झर्यो ।

बन्द गर्दा भएन । हडताल गर्दा नि भएन । धर्ना बस्दा भएन । लडाकू भर्ना गर्दा नि भएन । अनशन बस्दा भएन । भनसुन गर्दा नि भएन । टायर डढाउँदा भएन । चौकी जलाउँदा नि भएन । ढुंगा थुपार्दा भएन । रूख ढाल्दा नि भएन । आन्दोलनको बाढी लगाउँदा भएन । करोडौँका गाडी जलाउँदा नि भएन । गोली पड्काएर भएन । हलो अड्काएर नि भएन । चिच्याउँदा भएन । घिच्याउँदा नि भएन । बत्ती बाल्दा भएन । निभाउँदा नि भएन । बन्चरो बोकेर भएन । भित्तामा टाउको ठोकेर नि भएन ।

उदायो, उदायो, उदायो । नेताहरूका घैँटामा यसपालि घाम उदायो । नेपालले संविधान पायो ।
एनजीओले खेल्दा भएन । आईएनजीओले पेल्दा नि भएन । डलरले हान्दा भएन । युरोले बान्दा नि भएन । छिमेकीले कन्दा भएन । राष्ट्र संघले भन्दा नि भएन । दूत लाग्दा भएन । भूत जाग्दा नि भएन । यमदूत आउँदा भएन । मोदीजीले नै मुख बाउदा नि भएन । अविश्वास गर्न पनि मिलेन । सपना भन्न पनि मिलेन ।

पायो, पायो, पायो । हेर्दा हेर्दै यसपालि बानेश्वर चोकमा गोरुले बाच्छो पायो । आयो, आयो, आयो । रुन्चे हाँसो बोकेरै भए पनि यसपालि नेपालमा संविधान आयो ।
ढुकुमुकु ढुकुमुकु कसको हात ??

नेपाल, आश्विन १४, २०७२