नेपाली हास्यव्यङ्ग्य अनलाइन पत्रिका

(दिल्लीमा नेपालका तर्फबाट स्पष्ट राष्ट्रिय अडान र स्वाभिमानपूर्वक
राखिन सक्ने प्रस्तावको झलक)

तिम्रै पाउमा विन्ती राख्न आयौँ प्रभु
यी दुई महिना सारै दुख पायौँ प्रभु ।

कृपा गरी बन्द नाका खोलिदिनोस्
ठुलै आशा राखी दिल्ली धायौं प्रभु ।

थप–
द्रुत मार्ग तिमीलाई नै दिने भयौँ
तेल पुरै तिमीसितै लिने भयौँ ।

चाइनाको त हल्ला मात्रै चलाको हो
युएनमा नि तिम्रै लागि उभिने भयौँ ।

पुगेन भने–
नाकाबन्द भयो हाम्ले भन्या छैनौँ
तेल नपाको कति दिन भो गन्या छैनौँ ।

नदीको नि पछि कुरा मिलाऔंला
तपाईँले नि अझै नहर खन्या छैन ।

उपहारमा–
जे जे भयो ती कुरामा माफ गर्नुस्
महामहिम आज यो इन्साफ गर्नुस् ।

सके नाका पुरै खोल्नु पर्ने भयो
नसके नि अब त्यसलाई हाफ गर्नुस् ।

जय हिन्द जोरले
जय नेपाल त भन्नै भएन, कांग्रेसी नारा भइहाल्यो ।

चन्द्रनिगाहपुर, रौतहट