नेपाली हास्यव्यङ्ग्य अनलाइन पत्रिका

एक दिन बजार सामान किन्न गाको
जाँदा अजब गजब नै भाको
एउटा पसलमा जुत्ता
बल्ल बल्ल दुई हजारमा किनियो
त्यही जुत्ता आर्को पसलमा
आफ्नै अघि एक हजारमा छिनियो
थुक्क बजार
हेर्दा हेर्दै लुट्यो हजार ।
अर्को पटक
छ हजार भनेको ज्याकेट
चार हजार तिरियो
यसपाली त दङ्ग पर्दै अर्को पसल छिरियो
त्यही ज्याकेट झुन्डाएको देखेपछि
झट्टपट्ट ट्याग पल्टाइ हेरियो
के भन्नु ट्यागले तीन हजार जनायो
थुक्क बजार ! फेरि बाख्रो बनायो ।

फेरि अर्को पसलमा जाँदा
चिया मगायो चिसो मगायो
ससुराली गाको जस्तो स्वागत गरी गरी
यो साडी देखायो त्यो साडी देखायो
उम्कनै नसक्ने गरी बिल लेखायो
दश हजार भनेको साडी
छ हजारमा दिएपछि दङ्ग पर्दै ठोकियो
साउलाई पनि ससुरालाई झैं ढोगियो
घर आएपछि सबै खुशी छताछुल्ल पोखियो
त्यस्तै साडी दुइचार महिना अघि
चार हजारमै पाको रैछ
बजिया आज पनि टन्न नाफा खाको रैछ
कस्तो ब्यापार कस्तो बजार !
सरकार पनि यसमा छैन नजर
जुवा हारेको जस्तो कसलाई उजुर गर्ने
उजुर नगर्दा ठाडै ग्राहक मर्ने
जति अभावमा पनि
चलेको मूल्यमा पाउँदै नपाउने
ब्ल्याकमा किन्यो भने
जे समान पनि घरमै आउने
भनी देऊ न सरोकारवाला
उजुरी गर्ने ठाउँ कता छ
आजै जुलुस लिएर आउँछांै
उजुरी हाल्नेको ठुलै जत्था छ ।

दाङ, हाल : काठमाडौं