नेपाली हास्यव्यङ्ग्य अनलाइन पत्रिका

यहा छन्
बागबजार
तरकारी बजार
आज घुमाउँदै छु तपाइँलाई
काठमाडौंको सरकारी बजार
यहाँ पनि
तरकारी बजारमा जस्तो
जे पनि पनि पाईन्छ
बरु भन्नुस् तपाईंलाई के के चाहिन्छ ?
यताको शिक्षा मन्त्रालय हो
यसले हातधुने शिक्षा दिन्छ
उताको स्वास्थ्य मन्त्रालय
यसले परिवार नियोजनको कक्षा दिन्छ
दाँयातिरको मन्त्रालयले पहुँच हुनेलाई
बाढी पीडितको नाममा भिक्षा दिन्छ
बाँयातिरको चाहिँ
शिष्टाचारको ढोगढाग कार्यालय हो
अली परको चाहिँ
घरकै दाजुभाइलाई ठोकठाक मन्त्रालय हो
बायाँतिर जानु भो भने
लोडसेडिङ मन्त्रालय आउँछ
दाँयातिर जानु भो भने
नोट सेडिङ मन्त्रालय पाउँछ
माथितिर जानु भो भने
आपूर्ति तथा खाने मन्त्रालय
तलतिर जानु भो भने
ढल तथा पानी जाने कार्यालय
यताको छेउको बन सखाप कार्यालय
उताको छेउको धन सखाप कार्यालय
यहाँ हरिकङ्गाल पनि
बिना लगानी करोडपति हुन्छ
सडकछाप हुने पनि चन्द्रमा छुन्छ
यहाँ सब छ
त्यसैले त सरकारी बजार गजब छ ।
तर सर्व साधारणालाई छिर्न पास चाहिन्छ
पास छैन भने तपाइँको मान्छे खास चाहिन्छ
तरकारी बजार बन्द भए
सबलाई उकुसमुकुस लाग्छ
सरकारी बजार बन्द भए
धेरैलाई हाइ सन्चो लाग्छ
त्यसैले त हप्ताको
दुई दिन बिदा बनाउनेको माग छ ।
तरकारी बजारबाट
कतिको भात भान्सा चल्छ
कतिको रोजी रोटी चल्छ
तर सरकारी बजारबाट
भन्छन् देश नै चल्छ
तरकारी बजार आउनेहरू
झोलामा करेला बरेला बोकी लान्छन्
सरकारी बजार आउनेहरू
झोलामा ल्यापटप, कम्पुटर ठोकी लान्छन् ।

दाङ, हाल : काठमाडौं