नेपाली हास्यव्यङ्ग्य अनलाइन पत्रिका

हे बरै !
सारङ्गी बजाउँदा बजाउँदै
कर्खा गाउँदा गाउँदै
पुरानो इतिहासका
पुराना अक्षरहरू टेकेर
पुरानै बाटोमा हिँड्दा हिँड्दै
अचानक रोकियो गाइने
र नराम्ररी अलमलियो(
अब कुन गीत गाउने ?

पृथ्वी नारायणकोे सालिकमा
उठेको छ एउटा मात्र औंलो
तर फरक फरक छन् इतिहासका गीतहरू
फरक फरक छन् मान्छेका सत्यहरू !

अब कुन गीत गाउने ?

देब्रे हातमा धनुकाण बोकेर
एउटा परशुराम जस्तो मान्छे
त्यही सालिक तोडिरहेको छ
दाहिनेतिरबाट !
र दाहिने हातमा धूपअक्षता बोकेर
अर्काे नरसिंह जस्तो मान्छे
त्यही सालिक पुजिरहेको छ
देब्रेतिरबाट !

हे बरै !
अब कुन गीत गाउने ?

सायद हामीले गाएका
हिजोका गीतहरू नै गलत हुनुपर्छ
कि गलत हुनुपर्छ –
हामीले आज गाइरहेको
राष्ट्रिय गीत !!

काठमाडौं