नेपाली हास्यव्यङ्ग्य अनलाइन पत्रिका

उड्छन् दैनिक धेर कर्मठहरू पाखो बिरामी भयो
छोडे सन्ततिले भुलेर ममता माटो बिरामी भयो
भोग्दै हण्डर धेर खेप्न नसकी आभा बिरामी भयो
फिर्छन् ती जब बन्द बाकस यहाँ नाता बिरामी भयो ।

भत्केका निधि हेर मन्दिरहरू सृष्टी बिरामी भयो
भोकै बस्न छ बाध्य साधक यहाँ स्रष्टा बिरामी भयो
मर्छन् मानिस ओखती नकल ती डाक्टर् बिरामी भयो
पाएनन् जब काम शिक्षित यहाँ मास्टर् बिरामी भयो ।

सत्ता रोग भयो प्रशासन उही चिन्तन् बिरामी भयो
पुच्छर्नै जब थाल्छ शासन भने नेता बिरामी भयो
सत्ता मात्र सधैं लुछालुछ गरे आस्था बिरामी भयो
गर्दैनन् शुभ कर्म अक्षमहरू बाचा बिरामी भयो ।

नेपाली अति वीर भूत जगमा ऐले बिरामी भयो
यस्तैमा पनि चल्छ देश जसले सोच्यो बिरामी भयो
जागेनौं यदि आजकै दिनभने आत्मा बिरामी भयो
बोलेनौं अझ चुप्प नै सहिदिए बाँकी बिरामी भयो ।

काठमाडौं