नेपाली हास्यव्यङ्ग्य अनलाइन पत्रिका

गिद्ध घुम्छ आकाशमा पन्छीहरू डराउँदै छन्
परेवाको गुन्जबाट बचेरा ती हराउँदै छन् ।

सलहले दुख दिन्छ आमा भन्छिन् आँसु झारी
छोरो आउने हो कि होइन दुख छ रे मुग्लान पारि
बाबा भन्छन् खिया लाग्यो खुकुरीको धार छैन
सबै आफ्नै तालमा नाच्छन् हाम्रो सरकार छैन ।

जोगाउने कसरी हो छोरीहरू हराउँदै छन्
गिद्द घुम्छ आकाशमा पन्छीहरू डराउँदै छन् ।

दाजुभाइमा मेल छैन देख्छु सधैँ जालझेल
कहिलेसम्म चल्ने होला यहाँ मर्ने मार्ने खेल
छिमेकीकै भर छैन कस्तो बेला आयो हजुर
अरूलाई सताएर आफू मात्र खायो हजुर ।

उज्यालोको भान छैन स्याल, हुँचिल कराउँदै छन्
गिद्द घुम्छ आकाशमा पन्छीहरू डराउँदै छन् ।

हेटौडा
२०७२।१०।१५