नेपाली हास्यव्यङ्ग्य अनलाइन पत्रिका

पत्रकारहरू मादल बजाउँछन्,
लेखकहरू खैँजडी ठटाउँछन्,
नेताहरू गीत गाउँछन्,
कर्मचारीहरू भुँडी ढक्ढक्याउँछन्,
यही लयमा बज्छ
यो देशको राष्ट्र गान ।

भोका नाङ्गाहरूको सुस्केरा,
सिंहदरबारको उछ्वास,
अभावको दोहोरी,
महँगीको घण्ट,
सिपाहीको धारिलो बुट,
यावत् सङ्गीत भरिन्छ राष्ट्रगानको ।

समयले मौका छोप्छ,
एउटा कालो जन्तु आउँछ, खुट्टो उचालेर फर्कन्छ
अर्को आउँछ, खुट्टो उचालेरै फर्किन्छ
खैरोको होमवर्क पनि उसैगरी दोहोरिन्छ,
त्यो अविच्चिन्न क्रियामा
म सिंहदरबारको अमूर्त चित्र देख्छु !
जारी छन् नियम उपनियम
र, सत्ता परिवर्तनका च्याँखेदाउहरू !

‘बुद्धिमान्’ जन्तुहरू
पालैपालो
इँजार खोल्छन्, कस्छन्
नेपथ्यमा बजिरहेको छ,
प्रजातन्त्र, लोकतन्त्र, गणतन्त्रको
पार्श्व–सङ्गीत !!

काठमाडौं