नेपाली हास्यव्यङ्ग्य अनलाइन पत्रिका

आशा गरौँ
जुँगाहरूले पाइताला चाट्ने छैनन
हामीहरूलाइ सूर्यतिर फर्काएर
आफै अँध्यारोमा हराउने छैनन्
शब्दहरू लज्जित छन्
भावहरू भयभित छन्
उनीहरूका बोलीबाट,
र पनि
आशा गरौँ
रहिरहनेछ नाकको इज्जत
नाकहरू
कुनै चिल्लो भित्तामा ठोकिएर
फुट्ने छैनन्
यी आन्दोलनहरू
नाकबिहीन हुने छैनन्
आशा गरौँ
जुँगाहरूले पाइताला चाट्ने छैनन्
छायाँलाइ बुझ्न घाम भन्नुपर्ने भयो
रातलाइ बुझ्न दिन भन्नुपर्ने भयो
शब्द खिइरहेको छ
विश्वास बगिररहेको छ
र पनि
आशा गरौँ शब्दकोषहरू शब्दहीन हुने छैनन्
आशा गरौँ शब्दहरू अर्थहीन हुने छैनन्
हामीहरूलाई सूर्यतिर फर्काएर
आफै अँध्यारोमा हराउने छैनन्
आशा गरौँ जुँगाहरूले पाइताला चाट्ने छैनन् ।

काठमाडौं