नेपाली हास्यव्यङ्ग्य अनलाइन पत्रिका

आज विश्व शान्ति दिवस
त्यसैले दर्जनौ परेवाहरू
शान्तिको विगुल फुकेर
आकाशमा उडाइँदैछन्
तर व्यर्थै छ तिमीले
ती निर्दोष परेवाहरू उडाउनु
किनभने
कति कावा खाँदै गर्दा आकाशमा
गुलेलीले झारिन सक्छन्
कति बन्दुकको छर्राले
पानीघाटमा मारिन सक्छन्
कति चिल र वाजबाट
शिकारको लागि चारिन सक्छन्
र बचेका ती विचराहरू पनि
राती वासस्थानमा
एक–एक गरी टाउको निमोठेर
कान्छीको भट्टीमा तारिन सक्छन्
र तिमीले उडाएका ती परेवाहरू
शान्तिको धुनीसँगै हारिन सक्छन्
व्यर्थै छ तिमीले
ती निर्दोष परेवा उडाउनु ।

दाङ, हाल : काठमाडौं