नेपाली हास्यव्यङ्ग्य अनलाइन पत्रिका

घरको ढुकुटी भर्न
परको ढुकुटी खेलियो
ठुलो ढुकुटी बचाउन
साना ढुकुटी ठेलियो
करोडको ढुकुटी पचाउन
रिनै लिएर पेलियो
थुक्क ढुकुटी !
ठ्याक्क आफूले खाने बेला
ठूलो समस्याले जेलियो ।

न ढुकुटी खाइयो
न पैसो पाइयो
ढुकुटीको तनावले
झन सुकुटी पो भइयो
कहिले चौकी गइयो
कहिले ठानामा धाइयो
यही ढुकुटीले गर्दा आज
जोगी नै पो भइयो ।

न श्रीमतीको अत्तो छ
न छोराछारीको पत्तो छ
घरमा जाउँ भने
पैसा माग्ने लत्थ्यो छ ।
थुक्क ढुकुटी !
यसैले गर्दा
मोबाइलले पनि
छिन छिनमा गीत गाउँछ
उठाउन पनि डर नसकिने
किनभने
हरेक कलमा
ज्यानै लिने धम्की आउँछ ।

बाउले गरे कि
साउले गरे
खाली मिसकल मात्र हेर्या छु
अब त
मिसकलदेखि पनि डर लाग्छ
त्यसैले हरेक दिन
सिमकार्ड नै फेर्या छ ।

को पापीले यसरी
धन कमाउने यो जुक्ति सिकायो
अरु छाडी छाडी
ढुकुटी खेल्न देखायो
जुवा खेलेको भए पनि
गए सम्पति जान्थ्यो
गरिब भए पनि
कमसेकम सुखले
सपरिवारसँगै खान्थ्यो ।

थुक्क ढुकुटी !
खाए पनि सुख नपाइने
नखाए पनि सुख नपाइने
कस्तो खेल खेलिएछ
लोभमा फस्दै फस्दै
ठूलो सङ्कटमा जेलिएछ ।

दाङ, हाल : काठमाडौं