नेपाली हास्यव्यङ्ग्य अनलाइन पत्रिका

भुस्याहा कुकुरसँग
ड्यार्र ड्यार्र गर्दै
बाटोमा फालिएका
भात सिताले पालिएका
यो शहरमा
थुप्रै भोकहरू देखेँ मैले ।

भिडहरूकै छेउमा
घ्यार्र घ्यार्र गर्दै
पीडाले थलिएका
पेटीहरूमा ढलिरहेका
यो शहरमा
थुप्रै रोगहरू देखेँ मैले ।

घरै घरको जंगलमा
आफन्तहरू गुमाउँदा
समबेदना पिउँदै
खाटाहरू सिउँदै
एक्लै रोइरहेका
यो शहरमा
थुप्रै्रै शोकहरू देखेँ मैले ।

एकातिर
बच्चा नपाएर
तड्पिँदै गरेका
अर्कोतिर
बच्चा फालेर
भड्किँदै गरेका
यो शहरमा
थुप्रै्रै कोखहरू देखेँ मैले ।

कतै बैशले रुपैयाँ साटेका
कतै पैसाले खुपिया साटेका
कतै भातले रात साटेका
कतै मातले खाट साटेका
यो शहरमा
थुप्रै्रै चोकहरू देखेँ मैले ।

कतै किताब कापी फाली
जुलुस नारामा हिँडेका
कतै टायर मुढा बाली
ढुङ्गा मुढामा भिडेका
थुप्रै झोंकहरू देखेँ मैले ।

कतै दिनहुँ डेरा सारेका
कतै दिनहुँ डेरा चाहरेका
कतै मान्छेले मान्छे भाँडेका
कतै मान्छेले मान्छे ढाँटेका
कतै मान्छे मान्छेसँग फाटेका
कतै मान्छेले मान्छे काटेका
यो शहरमा
थुप्रै थोकहरू देखेँ मैले ।

दाङ, हाल : काठमाडौं