नेपाली हास्यव्यङ्ग्य अनलाइन पत्रिका

ल आउनुस् हजुर
अरु भन्दा सस्तो सस्तो
यही साग पाइन्छ
भन्नुस् यो सागभन्दा सस्तो
अरु के पो पाइन्छ ?

गाउँमा होस कि शहरमा
यही सागकै माग छ
भन्नुस् त हजुर
यो भन्दा सस्तो कुन लाग्छ ?
युरिया हाल्यो भने
रातारात हलक्क माथि आउँछ
दुई दिनमै धानको जस्तो गाँज लाउँछ
पर्रर भुट्यो भने हर्रर बासना पनि आउँछ
तीस रुपैयामा अचेल, सागभन्दा अरु के पाउछ ?

भर्खर टिपी ल्याको छ
मनोहराको पवित्र जलले
छलछली ध्वाको छ
सुँघ्ग्नुस् त कति कडा राग छ
त्यसैले होला मेरो सागको
अरुको भन्दा धेरै माग छ ।

हेर्नुस् न
कति कलकलाउँदो छ हलहलाउँदो छ
आज काट्यो भने झन पलाउँदो छ
यो साग खाएपछि त केटाकेटीहरू पनि
यही साग झैं हलक्क बढ्छन्
उमेरै नपुगि जवानीमा चढ्छन्
चालिसा नालाग्दै दारी जुँगा सब पाक्छन्
अधबैशमा कपाल पाकेर असी बर्से लाग्छन् ।

आउनुस् हजुर आउनुस्
साँझ पनि यही साग
बिहान पनि यही साग छ
एक पटक ट्राइ गरेर त हेर्नुस्
मेरो साग कस्तो लाग्छ ?
भातसँग सधै टन्न लाउनुहोस्
कति लखर लखर हिँडिरहने जिन्दगी
बरु साग खाएर फास्ट ट्रयाकबाट जानुहोस् ।

अर्र्गािनक बनाउन गोबर हाल्ने हो
गोबरका लागि कस्ले गाई बस्तु पाल्ने हो
मान्छेकै गोबर भए पनि हाल्नु हुन्थ्यो
सरकारले खुल्ला दिसामुक्त क्षेत्र भनेपछि
त्यो पनि अब कसरी बारीमा फाल्ने हो ?
धानमा जस्तै तरकारीमा पनि
युरिया मल नै डाल्ने हो
छिटो बढ्ने टन्न पनि फल्ने
अरु जे भए पनि के चासो
आफूले त खल्तीमा टन्न गाँठ हाल्ने हो ।

दाङ, हाल : काठमाडौं