नेपाली हास्यव्यङ्ग्य अनलाइन पत्रिका

राणाले यो गर्छु त्यो गर्छु भन्दै भनेन
राजाले कसैलाई गन्दै गनेन
यी नेताले कम्सेकम आश्वासन दिए
भला धन पैसो सबै आफै लिए
कम्तीका छैनन् यी नेता हाम्रा
यस्ता नेता पो हुन नेता राम्रा ।

पञ्चायतमा ढिलासुस्तीलाई औंलाए
तर लोकतन्त्रमा
भ्रष्टाचार र कालोबजारी झन मौलाए
सत्ता र भत्ताले नेता कति बौलाए
महङ्गी र अभावले जनता खौलाए
संसारमा कहाँ होलान् जस्ता नेता हाम्रा
यस्ता नेता पो नेता हुन्छन् राम्रा ।

त्यागको कुरा गर्यो भने
गुट त्यागी दिन्छन्
पार्टी त्यागी दिन्छन्
नागरिकता त्यागी दिन्छन्
उस्तै परे देशै त्याग्न सक्ने
साँझ टन्न घुस हसुरेर
बिहान मलमुत्र त्याग्न सक्ने
सिदान्त त्याग्न सक्ने
बिचार त्याग्न सक्ने
कम्ती त्यागी छैनन् गाँठे नेता हाम्रा
यस्ता नेता पो नेता हुन्छन् राम्रा ।

कुरा साना गर्दै नगर्ने
काम ठुला गर्दै नगर्ने
यो पनि आँट्ने त्यो पनि आँट्ने
जनतालाई खाली सपना बाट्ने
कागजमा त जनतालाई
प्रजातन्त्र दिए
लोकतन्त्र पनि दिए
गणतन्त्र पनि दिए
संविधान पनि दिए
दिनलाई त कम्ती दानी छैन नेता हाम्रा
यस्ता नेता पो नेता हुन्छन् राम्रा ।

दाङ, हाल  : काठमाडौं