बुख्याचा

बुख्याचा

बुख्याचा height=
दोबाटोमा ठडिएर बाटो रोक्न थालेको छ
आँगनमा उभिएर घाम छेक्ने गरेको छ {{read_more}}
घरकैे छानोमाथि पनि बस्न थालेको छ ।
यस अर्थमा
भित्र बाहिर
तल माथि
पूर्व पश्चिम
र दक्षिण चारैतर्फ
हिजोआज
म बुख्याचा मात्र देख्न थालेको छु ।
आश्चर्य छ
बुख्याचा
घुम्ने मेचमाथि बसेर
सोझा मान्छेलाई मीठो सपना देखाइरहेछ
गरीबलाई रसिलो आश्वासन दिइरहेछ ।
अर्को आश्चर्य !
बुख्याचाले देशको सीमाना देखेकै छैन
बुख्याचाले देशको इतिहास पढेकै छैन
बुख्याचाले देशको भूगोल नापेकै छैन ।
बास्तवमा
आँखा नभएको
कान नभएको
र
मन पनि नभएको
बुख्याचाबाट आशा गर्नु पनि बेकार हो ।
आखिर ऊ बुख्याचा न हो
अनि किन गर्छ ज्यूँदा मान्छेको रखवारी ?
अनि किन गर्छ शत्रुहरूलाई खबरदारी ?

बुख्याचा
हिजोआज
खेतबारिको रखवारी गर्न छोडेर
टुँडिखेल र सिंहदरबार वरिपरि
प्रातःभ्रमण गर्न थालेको छ
शहर मात्र होइन
गाउँका सडक र गल्लीगल्लीमा
दिनरात परेड खेल्न थालेको छ ।
साँच्चै, मेरो वर्तमान बुख्याचामय भएको छ
तेसैले आउनुस् महाशय
अब हामी सबैले
बुख्याचाको गुणगान गाऊँ
बुख्याचाको अभिनन्दन गरौं
उसलाई बग्गीमा राखेर शहर पत्रिक्रमा गराऔं
उसको प्रशँसामा गीत गाऊँ
र प्रशस्ति सुनाऊँ ।
बुख्याचा शक्तिशाली छ
बुख्याचा बलशाली छ
हिजोआज बुख्याचा
निर्मलाहरूको बलात्कार गर्न सिपालु छ
उखुबारीमा अम्बा टोक्दै ताण्डवनृत्य गरिरहेछ
र यो बर्तमान
बुख्याचाको ताण्डवनृत्य हेरेर हाँसिरहेछ !
बुख्याचाको ताण्डवनृत्य हेरेर रमाइरहेछ !!