नेपाली हास्यव्यङ्ग्य अनलाइन पत्रिका

अमर अधिकारी :

१.
पत्रकार – नेताज्यू ! तपाईं त कुनैबखत प्रधानमन्त्री हुनुहुन्थ्यो, राम्रो काम के गर्नुभो ?
पूर्वप्रधानमन्त्री – थाहा पाउनुभएन ? अकुत सम्पत्ति आर्जन गरेका भन्सारका पूर्व भ्रष्ट हाकिमलाई अख्तियारको प्रमुख बनाएको ?

२.
पत्रकार – तपाईं त पूर्व उद्योगमन्त्री ! औद्योगिक संस्थानमा के के सुधार गर्नभएको थियो त ?
पूर्वमन्त्री – थाहा नपाएजस्तो नगर्नुस् न ! म मन्त्री भएको बेला संस्थानमा आठकक्षा पनि नपढेकालाई सञ्चालक सदस्यमा नियुक्त गरेको थियो हैन र ?

३.
मतदाता – हाम्ले त्यत्रो भोट दिएर पठाको ! काम खास केही गर्नभएन नि नेताज्यू ?
नेता – अनभिज्ञले गरेजस्तो प्रश्न नगर्नुस् न । देशका युवाहरुलाई विदेशमा ट्वाइलेट सोहोर्नु पठाइसक्यौँ। गाउँमा खेतबारी बाँझो पारिसक्यौँ । त्यहाँभन्दा कनि गर्नु ?

४.
कार्यकर्ता – मैले पार्टीका लागि त्यत्रो त्याग गरेँ, ख्वै त मैले चान्स पाको ?
नेता – ठेकदारी गर्नुस्, डोजर म किनिदिउँला, कच्चा काम गरेपनि बजेट मिलेर हजम पारौँला नि त !

५.
पत्रकार – नेताज्यू ! तपाइँ त घरिघरि मन्त्री बन्नुभो देशका लागि के के प्रगति गर्नुभयो ?
नेता – सातपुस्तालाई पुग्ने सम्पत्ति कमाइसकेँ, यहाँको बैँकको खातामा नदेखिओस् भनेर विदेशी बैंकमा राखेको छु । ख्वै थाहा पा को ?

०००
खुंग्री, रोल्पा । हाल बुढानीलकण्ठ, काठमाडौं