नेपाली हास्यव्यङ्ग्य अनलाइन पत्रिका

अमर अधिकारी :

(अजर र अमरको संवाद)
अजरः अमरजी, तपाईँले फेसबुकमा केहि पनि नलेख्नुस्।
अमरः मेरो स्वतन्त्रता हो। किन नलेख्ने ?
अजरः तपाईँले कुनै कुनै कुरा फेसबुकमा राखेपछि गाउँमा मान्छेहरु भकुराभकुर गर्दा रहेछन्। रडाको मच्चिदोरहेछ। के शक्ति छ तपाईँको शैलीमा ?
-१-

(घरवालाको पानीको जार हराएपछि)
घरवालाः भर्खरै जार हरायो, कता गयो कता?
पाहुनाः जार हराउनु ठीकै त हो नि ! नत्र दुःख दिन्छन् जारले।
घरवालाः मान्छे जार भन्या हो र ? पानी राख्ने प्लास्टिकको नीलो भाँडो हरायो भन्या पो त।
-२-

(फलफूल पसलमा ग्राहक)
ग्राहकः साहुजी, कुन चाहिँ आँप मीठो हुन्छ होला ?
साहुः दशहरी लैजानुस्, मीठो हुन्छ।
ग्राहकः बीसहरी झन मीठो होला नि ! त्यो छैन ?
-३-

(उहिलेका कुरा)
वीरबलः तीतो सत्य कार्यक्रम किन बन्द भएछ, मैले त त्यो कार्यक्रम डेली हेर्थेँ।
बलवीरः हप्तामा एकपटक आउने कार्यक्रम कसरी डेली हेर्थ्यौ हो गफाडि ?
-४-

(सहचालक र जेष्ठनागरिकको चर्काचर्की)
जेष्ठनागरिकः खोई भाडा छुट? हामीलाई त्यसै ठग्ने !
सहचालकः क्याप लगाउन छाडेर ढाकाटोपी लाउनुस्, जिन पाइन्टको सट्टा सुरुवाल वा पाइजामा लाउनुस् ! सत्तरी वर्षमा पनि हिरो बन्नुपर्छ, छुट रे !
-५-

०००
खुंग्री, रोल्पा। हालः बुढानिलकण्ठ, काठमाडौँ।