नेपाली हास्यव्यङ्ग्य अनलाइन पत्रिका

अमर अधिकारी :

(प्रसूतिगृहमा गएपछि डाक्टरले गर्भवतीलाई जाँच्दै)
डाक्टरः पाठेघरको अवस्था कस्तो छ ? ठीक छ ?

गर्भवतीः शिशुघर भन्नुस् न डाक्टरसाब ! हामीले के बाख्राको पाठो पाउने हो र ?
१

(चिया गफमा व्यस्त लेखक र पाठक)
पाठकः तपाईँलाई भर्खरै नमस्ते गरेर गएका मान्छेलाई नमस्ते किन नफर्काउनु भएको ?

लेखकः हप्ता दिनपछि बल्लबल्ल एकपटक नमस्ते पाएको छु, त्यो पनि फर्कायो भने त मसँग नमस्ते सून्य हुन्छ।
२

(पल्लो छिमेकीले वल्लो छिमेकीलाई सोध्दै)
पल्लो छिमेकीः खाना भो ?

वल्लो छिमेकीः भो !

पल्लो छिमेकीः अनि फेरि किन पस्किन थाल्नुभो त ?

वल्लो छिमेकीः अघि त खाना तयार भो भनेको नि, तपाईँले भो मात्रै भन्नुभो, कि त खानुभो भनेर सोध्नुपर्थ्यो।
३

(श्रीमान् श्रीमती तरकारी पसलमा गएछन्)
श्रीमानः कोक्याउने पिँडालुको भाउ कति हो साहुजी ?

श्रीमतीः कोक्याउने किन भन्नुपरेको नि, पिँडालु मात्रै भने भैहाल्छ नि !

श्रीमानः तिम्ले मञ्जनलाई दन्तमञ्जन भन्न हुने मैले पिँडालुलाई कोक्याउने पिँडालु भन्न नहुने ?
४

०००
खुंग्री, रोल्पा। हालः बुढानिलकण्ठ, काठमाडौँ।