नेपाली हास्यव्यङ्ग्य अनलाइन पत्रिका

१.
के पिउँछौ ? अलिकति रम छ मसँग,
भरि बोतल होइन, थोरै कम छ मसँग,
आफ्नै पार्टी सत्तामा जो पुगेको छ
अरु के खोज्छौ यार ? दम छ मसँग ।

२.
कहिल्यै नमेटिने भोक दिएर गयौ,
पहिचान बिनाको रोग दिएर गयौ,
अरूको प्रगतिमा रमाउनै नजान्ने,
हामीलाई यो कस्तो झोंक दिएर गयौ ?

३.
सरकार तगडा छ, उसको रङ्ग रातो छ,
मरेका छैनन् जनता, थोरै थोरै तातो छ,
पेलिनु उसको नियति हो, हिजोअस्तिदेखिन्,
यो देशमा जनता पेल्ने कस्तो जाँतो छ ?

४.
विदेश जानेको लर्को गन्छ, हो यहाँ सरकार छ,
रोगीको उपचार गर्दिनँ भन्छ, हो यहाँ सरकार छ
जनताबाट कर उठाउँछ, सुविधा जति आफैं लिन्छ,
आन्दोलन देखेर ठसठसी कन्छ, हो यहाँ सरकार छ ।

०००
चितवन