नेपाली हास्यव्यङ्ग्य अनलाइन पत्रिका

१. फुट
भन्नेहरू सङ्गठन फुट्यो भन्छन्
म मन फुटेको देख्छु
खन्नेहरू विकासको मूल फुट्यो भन्छन्
म सहअस्तित्वको छाती टुटेको देख्छु
अरु फुटेको जुटाउन जोड्न सकिन्थ्यो
मानव मन र अस्तित्व नै लुटेको देख्छु ।

२. दलित गैरदलित
दलित नभएकै कारण कोटा नपाएको कुरा अर्कै हो
दलित भएकै कारण कोठा नपाएको कुरा अर्कै हो
मानवतामा योग्यतामा र चेतनामा यी केही चाहिँदैनन्
दलित र गैरदलित भन्दा खतरा त गरिबी छ मित्र
गरिब भएकै कारण भोटा नपाएको कुरा अर्कै हो ।

३. हाम्रा बा
हाम्रा बा हामी छिटै उठ्ता पनि घरमा हुँदैनन्
हामीले पकाउँदा, खादा, चुठ्ता पनि घरमा हुँदैनन्
थाहा छैन कहाँ जान्छन् हाम्रा बा
अरु त अरु अबेर सुत्ता पनि घरमा हुँदैनन् ।

४. मन परेको छैन
हाम्रा बा हेडमास्टर भएको मलाई मन परेको छैन
हाम्रा गाउँमा खरदार अङ्कलको घर अग्लो छ खरदार हुनुपर्ने
हाम्री आमा प्राध्यापक भएको मलाई मन परेको छैन
आठ पढेकी सुन्तली काकीको चिल्लो गाडी छ मेयर हुनुपर्ने
हाम्रो दाइ समाजसेवी बनेको मलाई मन परेको छैन
माथ्लाघरे हवल्दार दाइको कत्रो सान छ हवल्दार हुनुपर्ने ।

०००
काठमाडौं