नेपाली हास्यव्यङ्ग्य अनलाइन पत्रिका

रुद्र ज्ञवाली :

१.
दौडधुप छ सधै कहाँ पुगिन्छ पत्तो छैन
जीवनको घडा कहिले चुहिन्छ पत्तो छैन
संघर्ष जारी छ सधैं सधैं बाँच्नका लागि
आशाको त्यान्द्रो कसरी चुँडिन्छ पत्तो छैन ।

२.
भरेर कति दिइयो खाली कति दिइयो
धारेहात के कति र ताली कति दिइयो
सम्मान खोज्नेले यो पनि हिसाब गर्नुस्
सम्मान कति दिइयो गाली कति दिइयो ।

३.
आफ्नो मत बगैँचा अरूको झाडी नसम्झनुस्
आफूलाई विज्ञ र अरूलाई अनाडी नसम्झनुस्
निष्प्रयोजन छ नठान्नुस् प्रकृतिको सिर्जना कुनै
आफू मात्रै महान र अरूलाई कवाडी नसम्झनुस् ।

४.
कसै निमित्त सस्ता र कसैलाई दामी हुँदा रहेछन
कतैका पुजनीय राम पनि कतै हरामी हुँदा रहेछन्
जन्ती जानुस् भोज खानुस् या कक्टेल पार्टी गर्नुस्
असली साथीहरू त आखिरमा मलामी हुँदा रहेछन् ।

५.
नुनमा चिनी बिलाए सरहले बिलाउनु नपरोस्
चिनिउँ आफ्नै नामले अर्कैले चिनाउनु नपरोस्
यत्ति भए पुग्छ जिन्दगी बाँकी तृष्णा छैन केही
कसिङ्गर बनेर नजरमा कसैको बिझाउनु नपरोस् ।

०००