रेहित सैजुचार ठाेक्तक
हामी हाम्रै नियतिले बारम्बार पिटिएका छौँ मपाइत्वको रोगले झन् खुब पिल्सिएका छौँ कहिले यताका कुरा मान्यौँ, कहिले उताका कठै ! हामी यसरी नै भित्रभित्रै रित्तिएका छौँ ।
रेहित सैजु :
१.
बुद्धिमा दम हुनेहरूले शासन चलाउँछन् याद गर्नुस्
उस्तै परे भुसुनाले सिंहलाई तहलाउँछन् याद गर्नुस्
तिम्रो सिद्धान्त र मेरो जिउने पद्धति अलग छ महोदय
मर्ने बेलामा कमिलाको प्वाँख पलाउँछन् याद गर्नुस् ।
२.
अहम् भरिएको तिम्रो विचार समाउन सक्दिनँ
अहँ अरूलाई रुवाएर कदापि रमाउन सक्दिनँ
जेसुकै अभियोग हाल्नुस्, म सहजै स्वीकार गर्छु
तर देशको रगत चुसेर सम्पत्ति कमाउन सक्दिनँ ।
३.
बिना यो तपस्याले परिपक्व विचार मिल्दैन
अपरिपक्व निर्णयले कुनै व्यवहार मिल्दैन
ए मित्र ! अवस्थालाई बुझेर सही निर्णय गर्नु
पातहरूबाट रुखलाई उभिने आधार मिल्दैन ।
४.
हामी हाम्रै नियतिले बारम्बार पिटिएका छौँ
मपाइत्वको रोगले झन् खुब पिल्सिएका छौँ
कहिले यताका कुरा मान्यौँ, कहिले उताका
कठै ! हामी यसरी नै भित्रभित्रै रित्तिएका छौँ ।
०००
रामेछाप
हाल – भक्तपुर
सम्पादक – कल्पतरु द्वैमासिक
९८६२५८१६०२
Subscribe
Login
0 Comments
Oldest
