नेपाली हास्यव्यङ्ग्य अनलाइन पत्रिका

रुद्र ज्ञवाली :

१.
निर्धाको विपक्षमा सम्मति किन हुन्छ
सधैको अव्यवस्था बेथिति किन हुन्छ
जहिलेसुकै फाइदामा छन् बेइमानहरू
इमानदारलाई सधै फजिति किन हुन्छ ।

२.
कहिले कता तामेल भइने हो थाहा छैन
खुट्टाले खेल्ने खेल भइने हो थाहा छैन
झुक्याउँदै परीक्षा लिइरहन्छ जिन्दगीले
कुन परीक्षामा फेल भइने हो थाहा छैन ।

३.
रस चुस्नेहरू छुट्टै छन् काँडा अनाहक बदनाम हुन्छ
भन्न सकिन्न कतिबेला यो मन बर्बादीको सर्जाम हुन्छ
सञ्चै होला नि भन्ने खबर पठाउनु भएछ खुशी लाग्यो
जून छैन भने आकाशमा धर्तिलाई कसरी आराम हुन्छ ।

४.
जुवा हारेको जुवाडेलाई लगानी गरेको धनजस्तो
जताततै फुङ्ग उजाड ढढेलोले खाएको वनजस्तो
किन कुरूप विद्रुप र अभिशप्त लाग्दैछ वर्तमान
प्रिय वस्तु गुमाएपछिको शोक सन्तप्त मनजस्तो ।

०००