नेपाली हास्यव्यङ्ग्य अनलाइन पत्रिका

रुद्र ज्ञवाली :

१.

राजधानी मोफसल मनबाट यो भ्रम हटाई दिनु पर्छ
देशको पहरेदारी कसले गरिरहेछ त्यो बताई दिनुपर्छ
चार भन्ज्याङ्भित्र बसेर स्याल हुइँया कराइरहेछन् जो
उनलाई देशको नक्सा र एकथान चस्मा पठाई दिनु पर्छ ।

२.

अलिकति फुफु गर्दिनुस् बल्नेलाई बल्न काफी हुन्छ
आँच बढाउनुस चुलोमा गल्नेलाई गल्न काफी हुन्छ
कसैलाई जलाउन न सलाई चाहिँदो रहेछ न मट्टितेल
थोरै राम्रो कुरा सुनाउनुस् जल्नेलाई जल्न काफी हुन्छ ।

३.

हेपाहाको कमजोर माथिको हार्दिकता कस्तो रहेछ
देखाइने दृश्य कस्तो रहेछ वास्तविकता कस्तो रहेछ
हुँडार बस्तीमा पस्दा पनि गोठाला चुइक्क बोल्दैनन्
देखियो हाम्रो स्वतन्त्रता सार्वभौमिकता कस्तो रहेछ ।

०००
भैरहवा ।