रेहित सैजुपाँच ठोक्तक
लछार्छु पछार्छु झैँ गरी कसिएर लागेका छन् एकता गर्ने भन्दै कुकुर बिरालो जागेका छन् राजनीति जस्तो धुर्त्याई खेल अरु कुन होला .! हेर्नुस् न, सिद्धान्तलाई खुट्टामुनि दागेका छन् ।
रेहित सैजु :
१.
तातो बालुवामा पाइला चाल्न खोज्ने हामी हौँ
जेलाई पनि अनुकूलतामा ढाल्न खोज्ने हामी हौँ
म नौलो मान्दिनँ मित्र प्रतिफलमा धोका पाउनु
फाटेको दूधबाट घिउ निकाल्न खोज्ने हामी हौँ
२.
लछार्छु पछार्छु झैँ गरी कसिएर लागेका छन्
एकता गर्ने भन्दै कुकुर बिरालो जागेका छन्
राजनीति जस्तो धुर्त्याई खेल अरु कुन होला .!
हेर्नुस् न, सिद्धान्तलाई खुट्टामुनि दागेका छन् ।
३.
अस्तित्व बचाएर जसरी पनि टिक्नै पर्छ अब
रोएर या कराएर समयानुकूल बिक्नै पर्छ अब
सधैँको लाचारीपन हरे ! कति सहन्छस् अझैँ
कागले कोइलीको चतुर्याईं सिक्नै पर्छ अब
४.
अनुकूल जिउने जिन्दगानी चाहिएको छ
गन्तव्यमा सुनौलो बिहानी चाहिएको छ
जलिरह्यौँ पटकपटक आफ्नै नियतिले
बलेको मन निभाउने पानी चाहिएको छ ।
५.
बिना यो तपस्याले परिपक्व विचार मिल्दैन
अपरिपक्व निणर्यले कुनै व्यवहार मिल्दैन
अवस्थालाई बुझेर सही निणर्य गर्नु साथी
पातहरूबाट रुखलाई उभिने आधार मिल्दैन ।
०००
रामेछाप, हाल काठमाडौं ।
