नेपाली हास्यव्यङ्ग्य अनलाइन पत्रिका

कुमार खड्का :

(सत्ता र भत्ताको प्रसङ्गमा…)

मट्याङ्ग्रोले धपाउदैमा गिद्ध रीसले चुरमा छन्
तिजौरी कब्जा गर्न ठेलमठेल र आतुरमा छन्
खानैको निम्ति बाँचेका छन्,बाँच्न मात्रै कहाँ हो र ?
कोचिकोची हसुरेर अझै घिच्ने सुरमा छन् ।१

कोदोलाई तोरी भन्दा पत्याइदिनुपर्छ अब
कालीलाई गोरी भन्दा पत्याइदिनुपर्छ अब
हात्ती र हात्तिछाप उस्ताउस्तै हुन् नि हजुर,
सद्देलाई कोरी भन्दा पत्याइदिनुपर्छ अब ।२

मेथीको वृक्षरोपण, केरा पालन गर्ने भन्छन्
तोरी गेडा ओथारोमा आँप, लिची छर्ने भन्छन्
हलुवा स्वारी फलाउदै कृषि क्रान्ति गराएर,
बाघ, हात्ती, गैंडा दानले घ्याम्पेभुँडी भर्ने भन्छन् ।३

जति सिधा पार्नखोज्यो बाङ्गो ल्याकत बाङ्गै हुन्छ
जति ढाक्न खोजे पनि नाङ्गो औकात नाङ्गै हुन्छ
कुना पस्दै शिर झुकाइ घ्यू डकार्नु बेग्लै, तर
स्याल, ब्वाँसोको वृत्ति सदा प्रष्ट र उदाङ्गै हुन्छ ।४

०००
आलापोट, काठमाण्डौं ।
२०८१/११/२९