नेपाली हास्यव्यङ्ग्य अनलाइन पत्रिका

रूद्र ज्ञवाली :

१.
खिच्दैमा क्यमारेले मनको चित्र देखिने भए त
लगाउँदैमा चश्मा के के छ भित्र देखिने भए त
पाठ मध्येमा गाह्रो रहेछ मनको अध्याय पढ्नु
हेर्दैमा दूरविनले मान्छेको चरित्र देखिने भए त ।

२.
मनमा नबसेका कुराको डुङ्गाकोझैँ पाइलो हुन्छ
मन रमाए पो रमाइलो नत्र सबै नरमाइलो हुन्छ
नबोल्नेलाई बोलाउन पनि बात लाग्ला भन्ने डर
भन्छन् मन नपरेकाको बोली पनि बाइलो हुन्छ ।

३.
मुखुण्डो भित्र आकृतिहरू कति छन् कति
रूप बदलिरहने प्रवृतिहरू कति छन् कति
भोगेका सबै भोगाई भन्न मिल्दैन र मात्रै हो
उकुच पल्टिएका स्मृतिहरू कति छन् कति

४.
अग्लिन रहर गर्नेहरू उचाई दिनदिनै नपाउँदा रहेछन्
अग्लिनुको अनुभूतिमा मनका मचान बनाउँदा रहेछन्
चुकुल ठोक्छन् ढोकाहरूमा पर्दा तान्छन् झ्यालहरूमा
औकात चुलिएपछि मान्छेहरू अँध्यारो रुचाउँदा रहेछन् ।

०००
भैरहवा