नेपाली हास्यव्यङ्ग्य अनलाइन पत्रिका

विनोद खनाल

१
नेता हुँ म देशको भताभुङ्गे चाला,
लगाई दिन्छन् जनताले मलाई सुनको माला !
बनाउँछु टावर अनि देखाउँछु पावर ,
विपक्षीलाई खोजीखोजी रोप्ने गर्छु भाला !!

२
झोले हुँ म झोला बोक्छु, विदेशतिर जान्छु,
सर्बहारा जातै मेरो सबै थोक खान्छु !
गुण्डा पाल्छु,सोझा फाल्छु, भ्रष्टलाई बचाउँछु,
योग्यलाई निकालेर अयोग्यलाई छान्छु !!

३
केरा पालन गरौं सबले,बङ्गुर रोपौं अब,
मरिचको बोट लगाऊँ,आँप लहरामा जब !
फल्न थाल्छन् ,गाईको खेती गरौं साथीभाइ,
यति भएपछि देश समृद्धिमा जान्छ तब !!

४
शिक्षक जान्छन् क्लासमा उङ्छन् ट्युसन पढाउँछन्
कर्मचारी घुस लिन्छन्, तलब बढाउँछन् !
डाक्टर हुन्नन् हस्पिटलमा क्लिनिक मात्र धाउँछन्,
नेता भको दुई महिनामै महल ठड्याउँछन् !!

५
जनता मरे मरिरहुन्, बाचौं हामी नेता,
भ्रष्टाचारी जोगाउँछु, काला हुन् कि सेता !
मलाई कसले के गर्छ र ! दुई तिहाईको साथ,
आठ कक्षा पढे पनि सबै थोकको ज्ञाता !!

०००
धुलाबारी, झापा