नेपाली हास्यव्यङ्ग्य अनलाइन पत्रिका

रूद्र ज्ञवाली :

१.
विभीषण बनेर घरको पोल पठाएपछि
जलाएर घर उपहारमा गोल पठाएपछि
देश जल्दा यस्तरी जल्यो कि मुटु र मन
दमकल पठाउनुपर्नेले पेट्रोल पठाएपछि ।

२.
अनुहारमा नकाव लगाएर आउने को थियो
देशको सम्पदामा डढेलो लगाउने को थियो
छानबिन गर्नेले खोजबिन गर्न नभुल्नु होला
युद्धमा जस्तै मानव ढाल बनाउने को थियो ।

३.
हुन्छ कतैतिर अलि बढी झुकाव हुन्छ हुन्छ
नकावधारी त्यो अवश्य बेनकाव हुन्छ हुन्छ
जसरी भुट्यौ गोलीले चिचिला भविष्यहरू
एक दिन अवश्य खुनको हिसाब हुन्छ हुन्छ ।

४.
बेघर भएकाले बस्ने घर अझै पाएका छैनन्
सन्तप्त आँखा अझै राम्ररी ओभाएका छैनन्
कसरी मनाउनु दशैं देशले बर्खी बारेको बेला
आउँछु भनेर गएकाहरू फर्की आएका छैनन् ।

०००
भैरहवा