नेपाली हास्यव्यङ्ग्य अनलाइन पत्रिका

रमेश समर्थन :

१.
अलिकति जीवन ढुङ्गामाटामै छुटेछ
अलिकति जीवन चोयाभाटामै छुटेछ
कहाँ छुटेछ जीवन भनेर फर्केर हेर्दा
लाग्दैछ यो जीवन चौबाटामै छुटेछ ।

२.
कमाएकोबाट दुबैलाई आधाआधी भए पुग्छ
न्याय गर्न धनाढ्य वादी र प्रतिवादी भए पुग्छ
कालोकोटले कति राम्रो नजिर बसालेछ देशमा
देश चलाउन अब वापती र अपराधी भए पुग्छ ।

३.
मुरीका मुरी तिमी थन्क्याऊ, म मुठी र मानोमै खुसी छु
जति चुलिनु छ तिमी चुलिनू, सानो छु सानोमै खुसी छु
न हुँदा मात्तिनु परोस्, न नहुँदा आत्तिनु परोस्, बस् पुग्छ
सुनको गजुर तिमी नै लगाऊ म खरको छानोमै खुसी छु ।

४.
मित्र मनबाटै लखेटियो, मनभित्र सत्तुर भित्रियो
सहरीकरणसँगै विसङ्गति र विकृति जरुर भित्रियो
आधुनिक बन्ने रहरमा हुर्मत काढेर संस्कृतिको
गाई सडकमा धपियो र भान्सामा कुकुर भित्रियो ।

०००
रुपन्देही