नेपाली हास्यव्यङ्ग्य अनलाइन पत्रिका

रमेश समर्थन :

१.
फूल चुँड्नुको पीडा के हुन्छ त्यो डालीलाई सोध
पातहरू झर्नुको पीडा के हुन्छ हरियालीलाई सोध
सन्तानलाई विदेश पठाएर बाआमा कसरी बसेका छन् ?
बगैँचा उजाडिनुको पीडा के हुन्छ त्यो मालीलाई सोध ।

२.
को को के के हुन् अब मुखौटो उघारेर चिन्दा हुन्छ
कौडीमा बिक्न तयार छन् मोल लगाएर किन्दा हुन्छ
माननीय त के भन्नु अपमाननीय पनि भन्न मिल्दैन
निन्दनीय भनौँ भने पनि त निन्दा शब्दकै निन्दा हुन्छ ।

३.
‘क’ भन्छ, कोही त होस् जसले मुखमै खाना खसाइदेओस्‌
‘ख’ भन्छ, कोही त होस् जसले मुखको खाना चपाइदेओस्‌
अल्छी तिघ्रे मिठो जिब्रेहरूमा कोभन्दा को कम छ र हजुर
‘ग’ भन्छ, कोही त होस् जसले पेटको खाना पचाइदेओस् ।

४.
उहाँ सफल लेखक, हास्यव्यङ्ग्य लेख्नुहुन्छ
अर्काको आङमा जुम्रा हैन, लिखा नै देख्नुहुन्छ
कसैले उहाँका आङको भैँसी देखाएर त हेरोस्‌
भैँसी हाँक्ने त्यै लौराले उसैको पुर्पुरो सेक्नुहुन्छ ।

५.
म त्यो बाती हुँ जो आफै जल्छु र अन्धकारमा प्रकाश छर्छु
म हारसित हार मान्दिनँ, हारलाई नै हराउने प्रयास गर्छु
तिम्रो र मेरो विचारमा यति मात्र अन्तर छ ए मेरा साथी
तिमी विश्वासलाई सत्य मान्छौ, म सत्यमा विश्वास गर्छु ।

०००
रुपन्देही
बदनाम आँचल (२०८२)