सक्षम र सवल प्रदेश,सुनिश्चित अधिकार

पुष्पलाल पुस्तकालयमा ‘पठन संस्कृतिको विकास’ माथि बहस

'पठन संस्कृतिको विकासमा हाम्रो भूमिका' विषयक वहस कार्यक्रममा वक्ताहरूले पठन संस्कृतिको विकासका लागि आ-आफ्नो ठाउँबाट सबैले पहल गर्नुपर्नेमा जोड दिनुभयो ।

Nepal Telecom ad

मकवानपुर, २०८० फागुन २ । साहित्य सङ्‍गम मकवानपुरद्वारा सञ्चालित पुष्पलाल स्मृति पुस्तकालयको प्राङ्गणमा पठन संस्कृतिमाथि बहस कार्यक्रम सञ्चालन गरिएको छ ।

सङ्‍गम अध्यक्ष डीबी बर्तौलाको अध्यक्षतामा सञ्चालित कार्यक्रममा वक्ताका रूपमा पाठकहरूको प्रतिनिधित्व गर्दै शिवराज शाही, बालजागृति युवा वर्ष माविकी प्रधानाध्यापक सम्झना अधिकारी र समृद्ध समाज राष्ट्रिय दैनिकका सम्पादक सुरेश श्रेष्ठ सहभागी रहनु भएको थियो ।

वसन्त पञ्चमी तथा एघारौं राष्ट्रिय पुस्तक दिवसको अवसरमा आयोजित बहस कार्यक्रमलाई सङ्‍गम सदस्य संप्रस पौडेलले सहजीकरण गर्नु भएको हो भने बहसमा पुस्तकालयको सही र निरन्तर प्रयोग, अभिभावकको दायित्व, पठन संस्कृतिको व्यापकता बारे चर्चा गरिएको थियो ।

‘पठन संस्कृतिको विकासमा हाम्रो भूमिका’ विषयक वहस कार्यक्रममा वक्ताहरूले पठन संस्कृतिको विकासका लागि आ-आफ्नो ठाउँबाट सबैले पहल गर्नुपर्नेमा जोड दिनुभयो ।

पुस्तकालय निर्माण अभियानकर्मी तथा सम्पादक श्रेष्ठले शिक्षक र अभिभावकले आफैँ अध्ययन गर्नुपर्ने र बालबच्चाले त्यसैलाई हेरेर सिको गर्ने हुँदा पठन संस्कृतिको विकासमा यी दुवै पक्षको सबैभन्दा बढी भूमिका रहने बताउनुभयो ।

प्रधानाध्यापक अधिकारीले सामुदायिक विद्यालयमा विद्यार्थीहरूका लागि आवश्यक खेलकुद र पठनपाठनका सामग्री जुटाउनै धौ धौ परेको समयमा उचित र सुविधासम्पन्न लाइब्रेरी, कक्षाकोठामैँ पुस्तक उपलब्धता र घरघरमा यससँग सम्बन्धित क्रियाकलापमा जोड दिनमा कठिनाइ भइरहेको बताउनुभयो ।

सर्जक शिवराज शाहीले आफू कर्णाली भूगोलको रहेकाले यता पठन संस्कारबारे चर्चा भइरहेकोमा उता त्यो विषय उठान हुनै नसकेको र अन्य समस्याहरूले सताइरहेको विचार राख्नुभयो ।

डिजिटल डिभाइसको प्रयोगले यस संस्कृतिलाई सहयोग गरेको छ वा बाधा पुगेको छ भन्ने जिज्ञासामा भने मिश्रित प्रतिक्रिया प्राप्त भएको थियो ।

हेटौँडा उपमहानगरपालिका ५ नम्बर वडाका वडाध्यक्ष सुशिल घिमिरेको प्रमुख आतिथ्यतामा र हास्यव्यङ्ग्यकार आरसी रिजालको विशिष्ट आतिथ्यतामा आयोजित कार्यक्रममा साहित्य सर्जक, शिक्षक, निजामती, पत्रकार, नवसर्जकलगायत विभिन्न निकायका सरोकारवालाहरूको सहभागिता रह्यो ।

कार्यक्रममा देव दुलाल, सुवास सजल, स्वस्तिका दाहाल, शान्ति प्रियबन्दना, मालती पोखरेल, राजकुमार लामिछाने, मुक्तिगोविन्द वैद्य, अनु रोक्का, विश्वनाथ सञ्जेल, भवानी तिमल्सिना, रमेश अधिकारी, केशव समर्पण, छवि अनित्य, घनश्याम घिमिरे, सानु खनाल, हरि पौड्याल, सानुभाइ विश्वकर्मा, रजनी पौडेल, स्वस्तिका बानियाँ आदिको उपस्थिति रहेको थियो ।

अनुसुया खनालले सरस्वती बन्दना गाएर सुरु गरिएको कार्यक्रमलाई साहित्य सङ्गम सचिव मनोज पोखरेलले सहजीकरण गर्नु भएको हो ।

०००
– संप्रस पाैडेलद्वारा संप्रेषित

Fitkauli Publication Books comming soon
Nepal Telecom ad