नेपाली हास्यव्यङ्ग्य अनलाइन पत्रिका

ललितपुर, २०८२ कात्तिक २६ । जनमत वाङ्मय प्रतिष्ठानका अध्यक्ष ,जनमत साहित्यिक मासिकका प्रधान सम्पादक, नेपाल साहित्यिक पत्रकार सङ्घका केन्द्रीय अध्यक्ष तथा वरिष्ठ साहित्यकार मोहन दुवालको अध्यक्षता एवम् जनमत साहित्य बाटिकाको आयोजनामा महिला कविगोष्ठी तथा सम्मान कार्यक्रमको आयोजना चाकुपाट, ललितपुरमा भव्यतापूर्वक सम्पन्न भयाे।

उहाँले ‘हामी निरीह प्राणीका हत्यारा हौँ’ शीर्षकमा व्यङ्ग्यात्मक कविता वाचन गर्दै नेपाली भाषा, साहित्यलाई राज्यको अनुत्पादक ठान्ने प्रवृत्तिले साहित्यिक सर्जकहरूमाथि अन्याय भएको बताउनुभएको थियो। उहाँले निम्न मध्यम वर्गका जनता, गरिब र दु:खीमाथि अन्याय भएको चित्रण गर्दै, भ्रष्टाचार र अराजकताले सीमा नाघेको बताउनु भयो । साथै ,यस्तो अवस्थामा लेखक, साहित्यकार चुप लाग्न नहुने कुरा बताउनु भएको थियो ।

प्रमुख अतिथि नेपाली कला साहित्य डटकमकी अध्यक्ष तथा चर्चित कवि मोमिला जोशी जनमत वाङ्मय प्रतिष्ठानका अध्यक्ष मोहन दुवालद्वारा सम्मानित हुनुभएको थियो।
२०८१ मा आयोजित जनमतको ४१ ओैँ वार्षिकोत्सवमा सम्मानित व्यक्तित्व मोमिलालाई पुरक कार्यक्रम आयोजना गरेर उक्त सम्मान समर्पण गरिएको थियो । उहाँले सम्मान ग्रहण गर्दै साहित्यमा सामाजिक अनुमोदन हुनु भनेको ठुलो कुरा भएको बताउनु भएको थियो। उहाँले स्रष्टा-द्रष्टा मोहन दुवाल नेपाल देशले नचिनेको हिरा भएको ठोकुवा गर्दै ‘भीमसेनको सुसाइट नोट’ शीर्षकको कविता वाचन गर्नुभएको थियो ।

विशेष अतिथि, चर्चित साहित्यकार उषा शेरचनले महिला र समाजले भोग्नु परेका पीडा र अन्यायविरुद्ध जागृतिको शङ्खघोषसहित नयाँ चेतना र विद्रोहको खोजीको अपरिहार्य दर्साउँदै कविता वाचन गर्नुभएको थियो ।

विशेष अतिथि नेपाल प्रज्ञा-प्रतिष्ठानका प्राज्ञसभा सदस्य तथा नेपाल साहित्यिक पत्रकार सङ्घका केन्द्रीय महासचिव चेतनाथ धमलाले जनमत साहित्य बाटिका महिला कविगोष्ठीमा वाचन गरिएका १४ वटा कवितामाथि समीक्षात्मक टिप्पणी प्रस्तुत गर्नुभएको थियो। धमलाले वाचित कविताले देशको वर्तमान अवस्था, कुशासन, विकृति, विसङ्गति अराजकता, अन्याय र हिंसाविरुद्ध कविता प्रतिबिम्बित भएको धारणा राख्नुभएको थियो । उहाँले ‘आमा’ शीर्षकमा प्रस्तुत भएका कविताले आमा हुनु र जिउनुको चित्रण गर्दै मातृप्रेम र अगाध स्नेहका साथै महिलाले भोग्नु परेको पारिवारिक र सामाजिक हिंसा समेत चित्रण गरेको बताउँदै अबका कवितालाई कृत्रिम बौद्धिकताबाट जोगाउन निकै कठिन हुने बताउनु भएको थियो ।

जनमत साहित्य डटकमका सम्पादक तथा कवि सिर्जना दुवालले स्वागत मन्तव्यसहित ‘आत्मीय गठबन्धन’ शीर्षकको कविता वाचन गर्नुभएको थियो ।

यसैगरी जनमत साहित्य बाटिका महिला कविगोष्ठीमा प्रा.डा. सविना श्रेष्ठ, डा. सावित्री श्रेष्ठ, कमला कायस्थ,तारा केसी, पूर्णदेवी न्यौपाने, राधादेवी राजवंशी, सविता श्रेष्ठ ‘बेहोसी’, शारदा घिमिरे भैल, धनकुमारी न्यौपाने, मोतीशोभा श्रेष्ठले आआफ्नो कविता वाचन गर्नुभएको थियो ।
जनमतका सम्पादिका भारती श्रेष्ठ,पत्रकार भगवती तिमल्सिना लगायतको उपस्थिति रहेको यस कार्यक्रमको उद्घोषण मानवअधिकारकर्मी राजु सरकारले गर्नुभएको थियो । जनमतले नेपाली भाषा,साहित्य र संस्कृतिको क्षेत्रमा ४२ वर्षदखि विशिष्ट योगदान पुर्याउँदै आएको छ ।

स्रष्टा उत्पादनशालाको रूपमा समेत छवि बनाएको जनमत देश विदेशमा समेत सुपरिचित रहेको छ।

०००
प्राज्ञ चेतनाथ धमलाकाे साैजन्यमा ।