नेपाली हास्यव्यङ्ग्य अनलाइन पत्रिका

काठमाडाैं । अनुपम सिर्जना प्रतिष्ठान नेपालको १५९ औँ नियमित काव्यगाेष्ठी २१३ औँ भानु जयन्ती विशेषका रूपमा सम्पन्न भएकाे छ ।

काव्यगोष्ठी संस्थाका अध्यक्ष भुवनहरि सिग्देलको अध्यक्षता तथा प्रमुख आमन्त्रित प्रा. डा.जीवन अधिकारी, विशिष्ट अतिथि डा.बमबहादुर थापा जितालीकाे गरिमामय उपस्थितिमा सम्पन्न भएकाे हाे ।

उपत्याकाको पश्चिम भेकमा रहेको साहित्यिक संस्थाको यस काव्य गोष्ठीमा छन्द, लोकछन्द, र भानु केन्द्रित सिर्जना प्रस्तुत गरिएकाे थियाे ।

यस गरिमामय गोष्ठीमा जीवन अधिकारी (भुजङ्गप्रयात- सिर्जना उपासना), बमबहादुर थापा जिताली (शार्दूलविक्रीडित – भानुमोती खोजिनीति ), भुवनहरि सिग्देल (भानुको सिर्जना वाचन), नरनाथ लुइँटेल (तोटक – कति मर्नु – डिल्लीप्रसाद मुलतिहूनको सिर्जना), जगदीश्वर पोखरेल (स्रग्विणी – भानुमा वन्दना), दुर्गा रिमाल धिकारी (स्रग्विणी – जन्मिए मृत्युमा), बिनुबाबा घिमिरे (स्रग्विणी – लामखुट्टे), कमला पन्थी अधिकारी (स्वागता – वृद्धको सकस), वीरबहादुर लोहनी (लोकछन्द – भानुमहिमा) लगायतले रचना वाचन गर्नुभयाे ।

प्रमुख आमन्त्रित जीवन अधिकारीले अनुपम सिर्जना प्रतिष्ठान नेपालले छन्दको उन्नयनमा योगदान गरेको बताउँदै स्थापित र नवोदित सर्जकलाई आफ्ना रचना प्रस्तुत गर्ने, सिक्ने सिकाउने अवसर प्रदान गरेको छ भन्नु भयो । उहाँले वाचित कविताको समीक्षा गर्दै हाम्रा हरेक सिर्जनामा निर्मम आलाेचना नभएसम्म लेखन परिस्कार नहुने बताउनु भयाे ।

नयाँ आजीवन सदस्य कमला पन्थी अधिकारीलाई प्रमुख अतिथि घिमिरेले आजीवन सदस्यताकाे प्रमाण-पत्र प्रदान गर्नु भएको थियो ।

गोष्ठीका अध्यक्ष भुवनहरि सिग्देलले भानुले नेपाली भाषामा गरेको योगदानको चर्चा गर्दै भानुकाे जीवन प्रसङ्गमा लेखिएकाे पहिलाे प्रकाशित लेखकाे स्मरण गर्दै भानुका केही राेचक पद्यहरू उद्धरण गर्नु भएकाे थियाे । उहाँले एडमार्क कलेजले सभाकक्ष उपलब्ध गराएर सहयोग गरेकोमा धन्यवाद ज्ञापन गर्नुभयो । संस्थाको अनुरोधलाई स्वीकार गरी सहभागी भएर कविगोष्ठी सफल बनाई दिनु हुने सम्पूर्ण सर्जकलाई धन्यवाद दिँदै समारोह समाप्त भएको घोषणा गर्नु भएको थियो ।

कविगोष्ठीकाे सहजीकरण संस्थाका उपाध्यक्ष जगदीश्वर पोखरेलले गर्नु भएको थियो ।

०००
जगदीश्वर पाेखरेलकाे साैजन्यमा