नेपाली हास्यव्यङ्ग्य अनलाइन पत्रिका

जेठा बा को चिन्तै चिन्ता !!

यस्तै हाम्रा सदाका अविरल गरिने कार्यले हुन्न शान्ति
काला अत्यास लाग्ने विरहपन कथा सम्झँदा हुन्छ भ्रान्ति
जेठो छोरो गुमाएँ मनमुटु चुँडियो द्वन्दका मामिलामा
लड्छन् यी राष्ट्र-पाले अनवरत सदा भागबन्डा बिलामा !!
(४१)

मेराजस्तै समस्या वरपर कति छन् दुर्दशामा परेका
हाम्रो यो राष्ट्र भन्दै दिनपल धरणी नाम जप्दै मरेका
बेपत्ताका कता छन् भवबिच गणना राष्ट्रको तथ्य के छ ?
आमा बाबा गुमेका लहलह बिरुवा सम्झँदा चित्त रुन्छ !!
(४२)

हाँस्ने खेल्ने पलामा कुमुदित तनया घाँसमा फालिएका
जोत्ने खन्ने गराका नवसुत बलिया हाँकले मारिएका
के छन् खै राष्ट्र हाँक्ने जनसित बहुधा सत्यताका विधान ?
टड्कालो यो समस्या गहन छ कसले गर्न सक्ला निदान ?!
४३)

आशाका रास बोक्दै नवयुवक सबै अर्थका मामिलामा
बेच्दै छन् जीवनीका सकल बलबुता विश्वका कन्दरामा
जाँदा जो बाध्यताले परमुलुक उतै बन्नथाले विदेशी
बारी सर्वत्र झाडी विचलित धरणी बाँझिए खेत बेँसी !!
(४४)

यस्तै सम्झेर सुत्दा चसचस जहिल्यै शूलले रोप्छ छाती
निद्रा लाग्दैन साथी छिनछिन् घटना नित्य झुल्छन् र राति
हाम्रा यस्ता अनेकौँ मुलुकबिच हुने द्वन्दका छन् बिलाप
सारा यो राष्ट्र हाँस्ला मुसुमुसु कहिले भन् न- देवीप्रसाद ?!!
(४५)

क्रमशः
०००
२०७९/१०/८
ताप्लेजुङ, हाल काठमाडौं