नेपाली हास्यव्यङ्ग्य अनलाइन पत्रिका

’क्या बोर भयो’ यस शीर्षकका गीतकार क्षेत्रप्रताप अधिकारीजीलाई बोर भएको भएको हैन, संगीतकार न्ह्यू बज्राचार्यजीलाई पनि हैन । बोर भएको यस गीतका गायक योगेश्वर अमात्यलाई त झनै हैन, म प्रमोद अमात्यलाई पनि हैन है साथीहरू । बोर भएको हो- मेरा अफिसका सहकर्मी मार्कलाई । मार्क बडा हँसिला र रसिला छन् । ऊ मलाई नानाथरी रोचक र रमाइला किस्साहरू सुनाएर हँसाएको हँसाए गर्छन् ।

मार्कको अँग्रेजी म आधाआधी त बुझ्दिन, तर हाँस्न भने पूरै हाँस्छु । उसको अङ्ग्रेजी नबुझ्ने म लाटामात्र हो कि अरू पनि छन् भनेर अफिसमा रहेका म जस्ता प्रवासी तर अमेरिकाको विश्वविद्यालय पढेका केही साथीहरूलाई सोधेँ । उनीहरूले पनि मार्कको जोक आधामात्र बुझ्छन् भन्ने थाहा भएपछि भने म ढुक्क भएँ । म जस्ता लाटा अरू पनि रहेछन् भन्ने थाहा पाएर खुसी लाग्यो ।

हुन त उसलेमात्र मेरो सबै अङ्ग्रेजी लवज (विशेष गरेर उच्चारण) कहाँ बुझ्नु र ! तैपनि हाम्रो गफ बेलाबेलामा चलिबस्छ । खासमा हाम्रो कुरा मिल्छ । उमेर मिल्छ, छालाको रङ्ग नमिले पनि छालाको चाउरी मिल्छ । अनि कपालको सेतो रङ्ग मिल्छ । सिनेमा र टिभी शृङ्खला हेर्ने रुचि पनि मिल्छ ।

एकदिन अकस्मात् मेरो क्युबिकलमा आएर मार्कले खुइए गर्दै भने-
‘हिजो बडो बोर भयो’
‘किन ? के भयो त्यस्तो ?’ मैले जिज्ञासा र चिन्ता जताएँ ।
यी मेरा सहकर्मीमात्र हैन, मित्र पनि हुन् । त्यसैले, कहिले आफ्नी आमाको किस्सा सुनाउँछन् त कहिले श्रीमती गाथा । एकपल्ट ‘क्रिसमस अगाडि दुईदिन बिदा लिएँ नि मैले’ भनेर सुनाउन आएका थिए ।
‘किन भनेर सोधनँ’ फेरि थप्यो उसले ।
‘किन ?’
‘एकदिन श्रीमतीका लागि बजार गर्न, अर्को दिन आमासँग बजार जान ।’
फेरि थपे-
‘आमा र श्रीमतीसँग सन्तुलन बनाउन कति गाह्रो छ तिमीलाई के थाहा ? दुईजना हाकिमसँग काम गर्नु सरह हो बुझ्यौ ?’
यस्तो कुरा तिमीले भन्दा हामीले बढी बुझ्छौँ भन्न मन लागेको थियो, भनिन ।

खासमा उसकी आमा क्रिसमसका लागि केही दिन छोराकहाँ बस्न आउनु भएको रहेछ । अब यसमा मैले के बोल्नु ? सासू बुहारीको मामिला जो पर्‍यो । त्यसैले पहिलेकै प्रसङ्ग कोट्याएँ-
‘क्या बोर भयो भन्दै थियौ नि ?’
‘त्यो नेटफ्लिक्सको ‘मनि हाइष्ट’ वेब शृङ्खला छ नि ? त्यही के त टक्सार लुट्ने कथा भएको शृङ्खला ?’
‘त्यसमा के भयो ?’
‘त्यसमा’ अब के हुन्छ ? अब के हुन्छ’ को अवस्थामा फ्याट्ट शृङ्खला काटियो ।
‘कसरी त ? मैले घरमा हेर्दा त पूरै थियो त ।’
‘त्यसैले त बडो बोर भयो’ उसले लामो सुस्केरा हाल्यो ।
‘के के न भयो होला भन्ठानेको । जाबो नेटफ्लिक्सको कुरा रहेछ । नेटफ्लिक्सको खाता छोरीको हैन, तिनलाई भने सक्किगयो नि ।’

फेरि के सम्झेर थपेँ- ‘छोरीसँग खटपट भयो कि के हो तिम्रो ?’
‘छोरीसँग के को खटपट हुनु !’
हुन पनि हो, उसलाई छोरी साह्रै प्यारी थियो । छोराको भन्दा छोरीको धेरै बखान गथ्र्यो मार्क । त्यसैले छोरीसँग कचकच हुने सम्भावना धेरै कम थियो ।
‘अनि के भयो त ?’
‘छोरीसँग हैन, छोरीको अरूसँग खटपट भयो नि !’
‘फेरि आमा छोरीको खटपट भयो ?’
‘हैन, छोरी र छोरीको ब्वाइफ्रेण्डको खटपट भयो नि !’
‘अनि ? अब कस्तो छ त उनीहरूको सम्बन्ध ?’
‘के हुनु नि, उनीहरूको सम्बन्ध तोडियो, उनीहरूको ब्रेकअप भयो ।’
‘छोरीको उमेरकाहरूको दुईचार ब्रेकअप त भैहाल्छ नि । त्यो त अमेरिकी समाजमा सामान्य हैन र ?’
‘सम्बन्ध टुट्नु त सामान्य हो । त्यसले बोर भएको हैन क्या ! नेटफ्लिक्सको खाता टुटेर हो नि । खाता तिनको ब्वाइफ्रेण्डको थियो नि त । उनीहरूको सम्बन्ध उता टुट्यो, आफ्नो नेटफ्लिक्स यता च्वाट्ट चुँडियो ।’
फेरि साथीले थप्यो- ‘अब कसरी मनि हाइष्ट हेर्ने, कहाँ हेर्ने ?’
म एकछिन त ट्वाँ परेँ, के भन्ने, के नभन्ने भयो ।

छिनमा नै मुहारमा हाँसो ल्याउँदै उसले भन्यो –
‘हाम्रो वेब शृङ्खला हेर्न सकिएको छैन, अहिले तिमीहरू ब्रेकअप नगर त भन्न मिलेन । मिल्यो त ?’
‘मिलेन मिलेन’ हाँस्दै मैले पनि साथ दिएँ । कुरै हाँस उठ्दो थियो ।
‘तिमीहरूलाई अहिल्यै ब्रेकअप गर्न के खाँचो थियो भनेर सोध्न पनि मिलेन’ साथीले फेरि थपे ।
‘मिलेन मिलेन’ फेरि मैले पनि थपेँ ।
‘अब नयाँ ब्वाइफ्रेण्ड खोज्दा ‘नेटफ्लिक्स’मात्र हैन ‘डिस्ने प्लस’ समेत भएको खोज भनेर छोरीलाई भनन ।’

अनि उसले मलाई हेर्‍यो, मैले उसलाई; अनि हामी दुई मजाले हाँस्यौँ । असहज र असजिलो परिस्थितिलाई पनि सहर्ष स्विकार गर्नसक्नु उसको विशेषता हो । अप्ठेराहरूमा मुस्कुराउन सक्नु र साथीहरूसँगसँगै हाँस्नुको मजै अर्को, मखुला पासा ?

०००
साक्रमेन्टो, मे २६, २०२२