नेपाली हास्यव्यङ्ग्य अनलाइन पत्रिका

बसन्ती भुजेल :

बाबा आमा ज्युँदा देव नगरौ है हेला
हाम्रो पनि पालो त्यही आउँछ कुनै वेला
पाका मान्छे बसेको घर हुन्छ झलमल
तिन्को सेवा गर्न हामी किन अलमल ॥

घरै मन्दिर हुन्छ बाबाआमा साथ हँदा
धर्ती आकाश पनि रून्छ बाबाआमा रूँदा।
हामीलाई उनले पाली बाटो देखाएका
सकिँदैन गुण मेट्न पढ्न सिकाएका ॥

बच्चा बुढा उस्तै हुन्छन् भन्छन् वुझ्नेहरू
बच्चाले त एकैछिनमा भुल्छन् गालीहरू
पाकालाई वचन लागे हुन्छ छाती चर् चर
सानातिना कुरा सम्झी झार्छन् आँसु वर्वर ॥

जप ध्यान योग गर्दा वृद्धवृद्धाहरू
सधैँ स्वस्थ भई बाँच्छन् धेरै धेरै अरू
कृतकृत्य हुन्छौ हामी आशिष् वचन पाई
लौन सेवा गरौँ सधैँ वृद्धवृद्धालाई ॥

कहिले लगौँ मठ मन्दिर कहिले नयाँ ठाउँ
सास छउन्जेल गरौं सेवा पछि कहाँ पाऊँ।
हामी पनि वृद्ध हुन्छौँ एकदिन फेरि ।
यही सम्झी वृद्धलाई बस राम्रो हेरी ॥

०००
भक्तपुर