बिन्दु दहाल ‘मूकदर्शक’ज्येष्ठ र हाम्रो कर्तव्य
सम्मान गर्नलाई हामी अगाडि बढ्दा होला अनन्त राम्रो नाता बुझेर गढ्दा हामी अवश्य हुन्छौं सम्पूर्ण वृद्ध भोलि घोच्ने असाध्य तीखा त्यागौँ असभ्य बोली ।
बिन्दु दहाल ‘मूकदर्शक’ :
हुन् ज्येष्ठ श्रेष्ठ हाम्रा सम्पत्ति जान्नुपर्छ
विज्ञान ज्ञान दिन्छ्न् हुन् देव ठान्नुपर्छ ।
छर्छन् प्रकाश नौलो पार्छन् सबै उज्यालो
ती दिव्य ज्योति आभा सत्कर्मका दियालो ।
भोकै बसेर आफ्ना सन्तानलागि मर्छन्
ती वृद्ध ज्येष्ठ सारा कर्तव्य जे छ गर्छन्
हुन् गेहका छहारी माधुर्य प्रेम दिन्छन्
के गर्नुपर्छ मैले भन्ने रहस्य चिन्छन् ।
मानौं कि सूर्य जस्तै हाम्रो भविष्य नाता
जोडिन्छ ज्येष्ठमा हुन् पानी र अन्नदाता
सङ्कष्ट हर्न सक्ने दीक्षा समुच्च ज्ञान
इच्छा गरौं सबैले ती ज्येष्ठ छेउ जान ।
झारेर आँसु कोही रुन्छन् कि हेर्नुपर्छ
हाँसेर बाँच्न पाऊन् माया छ बेर्नुपर्छ
भोका अनाथ जस्तै आत्माविलाप गर्ने
कोही भए सघाऔँ सेवा छ यो नमर्ने ।
सम्मान गर्नलाई हामी अगाडि बढ्दा
होला अनन्त राम्रो नाता बुझेर गढ्दा
हामी अवश्य हुन्छौं सम्पूर्ण वृद्ध भोलि
घोच्ने असाध्य तीखा त्यागौँ असभ्य बोली ।
०००
दमक, झापा
Subscribe
Login
0 Comments
Oldest
