नेपाली हास्यव्यङ्ग्य अनलाइन पत्रिका

रामशरण न्यौपाने :

पोसेर आफ्नो रज रक्तलाई
थप्दै नयाँ बैँस दिगो बनाई
जो गर्दछन् जीवन-दीप दान
माता पिता नै गुरु हुन् प्रधान॥

माया दयाका भल निर्झरीको
मुहान नै हुन् नव जिन्दगीको
गाथा तिनैको गर रोज गान
माता पिता नै गुरु हुन् प्रधान॥

माटो चिनाए कति हात तानी
बाटो हिँडाए दशकर्म धानी
ती जूनका हुन् रविका निशान
माता पिता नै गुरु हुन् प्रधान॥

सारा सिकाए जिउने विधान
बाधा गरे पूर्ण सबै निदान
दाता र धात सुख सान मान
माता पिता नै गुरु हुन् प्रधान॥

हेर्दा नि प्यारो मुहुडा उनैको
झल्किन्छ सच्चा प्रतिमा सुनैको
मेटिन्छ सारा तनको थकान
माता पिता नै गुरु हुन् प्रधान॥

०००
भक्तपुर