नेपाली हास्यव्यङ्ग्य अनलाइन पत्रिका

रामशरण न्यौपाने :

आमा बाबाको यादले पोल्छ छाती
निन्द्राकी देवी भाग्दछिन् घोर राती
यो सारा गर्ने दैव नै हो कि घाती ?
मैले देखेका स्वप्न छन् धेर थाती ॥१

दौडायो बा आमा दैवले दूर खोसी
आँखामा मेरा आँसु झारेर कोसी
आएँ सोलामा हा ! रुँदै अग्नि झोसी
द्यौता वा पापी व्याधि हो खास दोषी ?॥२

भावी हो भन्छन् भाग्य लेख्ने विधाता
को होला हाम्रो आयु आरोग्य दाता?
खोटो नै पार्दै बैँसमा भाग्य खाता
मेटायो कस्ले रक्तको लाल नाता? ॥३

मान्छेको भन्छन् आयु नै हो शतायु
धेरैको देखेँ खासमा चीर आयु
पल्टे झैँ साँच्चै वाणलाग्दा जटायु
आमा बाबाको खुस्कियो शीघ्र आयु ॥४

थाप्लोमा बोकायो हेर ग्राहस्थ भारी
बच्चै बेलामा भाग्यमा प्वाल पारी
जाउन् वैकुण्ठै स्वर्ण ढोका उघारी
अर्पेँ श्रद्धाले फूल लेउन् सकारी ॥५

०००
भक्तपुर