नेपाली हास्यव्यङ्ग्य अनलाइन पत्रिका

रामशरण न्यौपाने :

गयो जेथा ज्यादा हर किसिमका ओखती गर्न जाँदा
बनेका छन् धेरै अनुज अहिले दामको निम्ति बाँधा
गए आशा इच्छा जति पनि महान् फूलजस्तै झरेर
बिरामी छिन् आमा जलन थपियो वैद्य कच्चा परेर॥१

जँचाएको भन्दै हरपल लिने शुल्क चर्को छ उस्को
खरानी नै भन्ने अनुपम बुटी चाल अर्को छ उस्को
नजानेको भन्दा पनि गुरु म नै भन्छ बर्दी धरेर
बिरामी छिन् आमा जलन थपियो वैद्य कच्चा परेर॥२

रुँदै भन्छिन् आमा प्रतिदिन गर्‍यो वैद्यले घाउ थप्ने
भयौ छोरा कस्ता असफल लुते वैद्यको नाम जप्ने ?
भनूँ के पो मैले? हृदय भर झन् दर्द ज्यादा भरेर
बिरामी छिन् आमा जलन थपियो वैद्य कच्चा परेर॥३

सबैका आमा छन् बहुत सुखमा पुत्रको स्नेह पाई
हिँडेका छन् रोजै प्रगतिपथमा शान्तिको गीत गाई
भयो बाँच्नै गार्‍यो यस अवनिमा पुत्र आफू दरेर
बिरामी छिन् आमा जलन थपियो वैद्य कच्चा परेर॥४

किरा नै भन्कायो अहह गहिरो घाउ कस्तो बनायो ?
सबै जोरीपारी पर पर भए ठ्वास्स साह्रै गनायो
म बाँचेको के भो? यस अवनिमा अर्थ आधा मरेर
बिरामी छिन् आमा जलन थपियो वैद्य कच्चा परेर॥५

छिटै फेरौँ अर्को बहुत गुनिलो वैद्य भन्दैछ कोही
छिटै देख्ने भेट्ने अनुपम बुटी मार्ग खन्दैछ कोही
म मात्रै दोधारे मन बिच परेँ बस्नु खै के गरेर ?
बिरामी छिन् आमा जलन थपियो वैद्य कच्चा परेर॥६

०००
भक्तपुर