नेपाली हास्यव्यङ्ग्य अनलाइन पत्रिका

कृष्णप्रसाद पौडेल `जस्ताघरे´:

भाग्यो शरद् धराको आज्ञानुसार भन्दै ।
हेमन्त यो उदायो जाडो प्रवाह गर्दै।।
बस्ती र कन्दरामा बेहाल मच्चिँदै छ।
स्याहार वृद्धवृद्धा हेमन्त उर्लिँदै छ।। -१

पाखा, गुफा, धुरामा डाँफे चिबे कराए ।
मैना र कोइलीले चीत्कार गीत गाए।।
ठन्डी र हुस्सु जाग्यो उत्पात निम्तिँदै छ।
स्याहार वृद्धवृद्धा हेमन्त उर्लिँदै छ।। -२

छोरी कठै बुहारी भान्सातिरै हराए ।
बाबा मुमा सिरेटो खाँदै खुबै डराए।।
उद्धार भाव माया सत्कार खस्किँदै छ ।
स्याहार वृद्धवृद्भा हेमन्त उर्लिँदै छ।। -३

बारी गरा बगैँचा हेरेर डाक्न ख‍ोज्छन्।
जाग्यो कडा तुसारो भन्दै किसान रुन्छन्।।
आयो चिसो धरामा सन्ताप उक्लिँदै छ।
स्याहार वृद्धवृद्धा हेमन्त उर्लिँदै छ।। -४

अग्ला हिमाल रम्दै मुस्कानले पुकार्छन् ।
टाँकी गुराँस सल्ल‍‍ो हेमन्त चाल बुझ्छन्।।
जाडो कुना तराई सर्वत्र फैलिँदै छ ।
स्याहार वृद्धवृद्धा हेमन्त उर्लिँदै छ।। -५

०००
बट्टार, नुवाकोट । हाल: माछापोखरी, काठमाडौँ ।