नेपाली हास्यव्यङ्ग्य अनलाइन पत्रिका

रामशरण न्यौपाने “पाँचघरे”:

जाडो भव्य हिमालको शिशिरले बोकेर ल्यायो तल
हाल्दै बिस्कुन चारतर्फ हिउँको सेताम्य पार्‍यो थल
बाक्ला वस्त्र र खाद्य पोषणलिँदै सानन्द साह्रै परी
पाउन् बस्न बुढाबुढी शिशिरमा तातो र न्यानो गरी॥१

भन्छन् लोक रुई फुई अनि दुई चाहिन्छ जाडोहुँदा
मान्छेमा सय रोग लाग्छ सहसा भारी चिसोले छुँदा
खोकीसम्म कदापि ख्वाक्कनगरी जाओस् न माघेझरी
पाउन् बस्न बुढाबुढी शिशिरमा तातो र न्यानो गरी॥२

ढल्छन् वृद्ध निमोनिया हुन गई ठण्डी गडेमा अति
मौकामा उपचार गर्न नसके त्यो देह होला खती
होउन् पुत्र बधू उदार दिलका टेवा दिने बेसरी
पाउन् बस्न बुढाबुढी शिशिरमा तातो र न्यानो गरी॥३

आगो ताप्न बनोस् समुन्नत चुलो होस् घामताप्ने पिँढी
शय्या दक्षिणको उँचोतिर रहोस् कालो नहोस् त्यो छिँडी
खाना पोषणदार सात्विक बनोस् मीठो सुधा नै सरी
पाउन् बस्न बुढाबुढी शिशिरमा तातो र न्यानो गरी॥४

पाका मानिस मान्य हुन् अवनिका भन्ने सबैले बुझून्
सच्चा ईश्वर हुन् भनेर जिउँदा आस्था जगाई पुजून्
कोहीबाट कुनै प्रताडित नहून् अन्याय ज्यादा परी
पाउन् बस्न बुढाबुढी शिशिरमा तातो र न्यानो गरी॥५

०००
चाँगुनारायण न.पा. ३, भक्तपुर