नेपाली हास्यव्यङ्ग्य अनलाइन पत्रिका

एसके निधन :

विद्यार्थी : सर कता हुनुहुन्छ ?
शिक्षक : नौ बज्यो जागीर खल्तीमा हाल्दै छु ।
विद्यार्थी : म डा. कृष्ण देव हजुरको पूर्व विद्यार्थी, आज गुरुपूर्णिमा यसैले सरलाई सम्झेको ।
शिक्षक : धन्यवाद ! खुशी लाग्यो ।
विद्यार्थी : अनि सर जागीर खल्तीमा भन्नाले ?
शिक्षक : डा. साब हामी बोर्डिङ मास्टरहरु प्रत्येक बिहान जागीर खल्तीमा हालेर स्कुल जान्छौँ । हरेक दिन त्रासमा बिताउँछौँ कतै खल्तीको जागिर खसिहाल्ने हो कि, घर फर्किँदा जागीर यतै छुट्ने हो कि भनेर । जब बेलुकी जागीर सहित फर्किन्छौ, अचाक्ली खुशी हुन्छौ अर्को दिन बिहानसम्म ।
विद्यार्थी : ओहो ! सर त्यस्तो तनावग्रस्त भएर कसरी काम गर्नु ! जाबो बोर्डिङ छोडेर कुनै व्यवसाय गरे हुन्न र ?
शिक्षक : सकिनु पर्छ भनेर मैन बत्ती बल्न छाडे, रात पर्छ भनेर पृथ्वी घुम्न छाडे, प्रसव पीडा सम्झेर महिलाले गर्भ अस्विकार गरे के होला डा. साब ?
विद्यार्थी : कुरो बुझिनँ सर ।
शिक्षक : स्पष्ट भनौ है त, हामीले हजुरले भन्या जस्तै गरेर शिक्षण पेशा छोडी व्यापार व्यवसाय गर्न थाल्यौँ भने तपाईं हजुर एक्लैको स्वास्थ सेवाले यो देशलाई पुग्ला र ?
विद्यार्थी : क्षमा प्राथी छु सर ! हजुरलाई सधैँ शिक्षण पेशामा देख्न पाउँ ! ह्यप्पी गुरुपूर्णिमा ।
शिक्षक : लभ यु माई डियर ।

०००
हेटौंडा