बन्यौँ भ्रष्ट आफैँ पर्यौँ तालिकामा
थिए ब्याङ्क खाता भरी नोट टन्न । सबै राज्यले नै लियो के छ भन्न ।। गर्यौँ जे सहेनन् पर्यौँ जालिकामा । बन्यौँ भ्रष्ट आफैँ पर्यौँ तालिकामा ।।
कविराज घिमिरे :
गलामा छ सिक्री शिरै चन्द्रमाको ।
घडी लाख पर्ने छ राम्रो मजाको ।।
बिटो आउँथ्यो भ्रष्टको सङ्गतीमा ।
बन्यौँ भ्रष्ट आफैँ पर्यौँ तालिकामा ।।१
छ साडी पुरानो न चोलो छ राम्रो ।
सधैँ एउटै लाउँदा सान हाम्रो ।।
गयो भन्दथिन् श्रीमतीले सुदामा
बन्यौँ भ्रष्ट आफैँ पर्यौँ तालिकामा ।।२
बसेकोछ छोरो नयाँ कार भन्दै ।
यही हो बुढ्यौली सहारा विचार्दै ।।
कमायौँ लुट्यौँ राज्य जेठो हुँदामा ।
बन्यौँ भ्रष्ट आफैँ पर्यौँ तालिकामा ।।३
लुट्यौँ स्वर्ण भन्सार आफ्नो गराई ।
निजा अङ्ग छन् राज्य छैनन् पराई ।।
सिधा जो छ हाल्यौँ अँध्यारो कुनामा ।
बन्यौँ भ्रष्ट आफैँ पर्यौँ तालिकामा ।।४
छ आवास त्यस्तै उता छन् घडेरी ।
सधैँ अर्थवर्षा नलाग्ने खडेरी ।।
कमायौँ सकेसम्म हाले थुनामा ।
बन्यौँ भ्रष्ट आफैँ पर्यौँ तालिकामा ।।५
थिए ब्याङ्क खाता भरी नोट टन्न ।
सबै राज्यले नै लियो के छ भन्न ।।
गर्यौँ जे सहेनन् पर्यौँ जालिकामा ।
बन्यौँ भ्रष्ट आफैँ पर्यौँ तालिकामा ।।६
०००
भक्तपुर !