नेपाली हास्यव्यङ्ग्य अनलाइन पत्रिका

रामप्रसाद पन्थी :

टिकटका कारण म स्वयमले धेरैपटक धेरै ठाउँमा सास्ती भाेगेकाे छु । मैले मात्रै किन तपाईंहरू धेरैले भाेग्नु भएकै हाेला ? जाबाे टिकटका कारण पाएकाे दुःख पनि कसलाई सुनाउने भन्नुभएकाे हाेला ! मलाई थाहा छ, तपाईं मनकाे बह कसैलाई नकह भनेर बस्नुभएकाे छ । बाेल्नेकाे पिठाे बिक्छ नबाेल्नेकाे चामल पनि बिक्दैन भन्ने कुरा त मैले भनिरहन पर्ने कुरा हाेइन । तैपनि स्मरण गराउन खाेजेकाे मात्रै ।

आजभोलि तपाईं जहाँ जानुहाेस् टिकट र टाेकनकाे लाइन नभएकाे ठाउँ हुँदैन । जहाँसम्म टिकटकाे कुरा छ ; टिकटले आधिकारिक प्रमाणकाे भाउ पाएपछि यसकाे के कुरा गर्नु र ? कुरा गरे कुराकै दुःख हुन्छ । नगरे कलेजी मन छुन्छ । टिकट चाहिने ठाउँमा टिकट लिन मान्छेले दाउ छाेप्नु परेका कथा र बेथा भाेग्नु परेकालाई नै थाहा हाेला । अरूलाई के थाहा? यहीँ टिकट पाउनलाई कतिका पाउ छाेप्नु परेकाे हाेला ? बजारमा टिकटकाे भाउ बढ्न थालेपछि दाउ , बाउ र बडाबाउहरूकाे पनि ह्यउ कति बढेकाे हाेला ?

के तपाईं टिकटकाे फिक्रीमा हुनुहुन्छ ? भनेकाे बेलामा टिकट नपाएर हैरान हुनुहुन्छ ? ब्ल्याकमा लिनुपर्ने तनाव झेल्नु भएकाे छ ? टिकटकाे लाइनमा बस्दा बस्दा आजित हुनुहुन्छ ? लामाे लाइनमा बस्दा पनि कसैले आजलाई टिकट सकियाे भनेर हतास गराएका छन् ? अब फिक्री नगर्नुहोस् । हामीले टिकट सम्बन्धि सम्पूर्ण समस्याको हल लिएर आएका छाैं । नेपालभित्र तथा बाहिर हामी यहाँलाई सेवा दिन तयार छाैं । नाे सर्भिस चार्ज। अर्डर हुनासाथ टिकट तपाईंको साथ ।

हाे हामीले बजारमा ‘टिकट बिक्री सेवा केन्द्र´ लिएर आएका छाैं । याे विशुद्ध गैरनाफामूलक केन्द्र हाे । टिकट पीडित मनहरूलाई सेवा पुर्याउने यस सेवा केन्द्रकाे एकमात्र लक्ष्य हाे । हामी न्यूनतम शुल्कमा अधिकतम् सेवा दिनमा प्रतिबद्ध छाैं ।

टिकट बिक्री सेवा केन्द्रबाट कस्ता सेवाहरू उपलब्ध गराइन्छ ? यहाँहरूकाे जिज्ञासा हाेला । जिज्ञासा हुनु स्वभाविक हाे। हेर्नुहाेस्, हामीकहाँ सबै किसिमका टिकट सहजै प्राप्त गर्न सक्नुहुन्छ । स्वास्थ, शिक्षा, यातायात, सञ्चार, खेलकुद, मनाेरञ्जन, राजनीति … तपाईंलाई कुन क्षेत्रकाे टिकट चाहियाे ? हामी उपलब्ध गराउछाैं । हामीकहाँ अनलाइन र अफलाइन दुवै किसिमकाे व्यवस्था छ । तपाईंको एक कल फाेन , म्यासेज वा कुनै पनि किसिमको सूचना प्राप्त हुनासाथ हामी सेवामा हाजिर हुनेछौं ।

कुरा प्रष्ट बुझिएन ?
सुन्नुहाेस् म प्रष्ट पारिदिन्छु । प्रष्ट मात्रै किन छरपस्ट पारिदिन्छु । कुराे छरपस्ट भएपछि भ्रष्टहरू त्रस्त र ग्रस्त हुन्छन् कि ?

ठीक भन्नुभयाे गर्न खाेजेकै यही हाे । हामी सबै कुरा पारदर्शी हाेस् भन्ने चाहन्छाै । नव युवाकाे भावनालाई कदर गर्दै बदलिँदो परिवेशमा चल्न चाहन्छाैं ।

विदेशी लगानी छ कि ?

बिलकुल छैन ।` टिकट बिक्री सेवा केन्द्र ´ विशुद्ध नेपाली ब्रान्ड हाे । यति मात्रै भनाैं यसमा विदेशीहरूकाे शुभेच्छा अवश्य छ ।

के के सुविधा दिन्छ सेवा केन्द्रले ?

तपाईंको आवश्यकता भन्नुहाेस् । हामी सेवा उपलब्ध गराउँछाैं । तपाईंलाई कहाँकाे कस्ताे टिकट चाहियाे ? हुलाकघर, सिनेमाघर, मेला- महाेत्सव , प्रदर्शनी स्थल, अस्पताल, यातायात …कुन क्षेत्रकाे ?

सवारी साधनकाे चाहियाे ? कृपया खुलाउनुहाेला। हामीसँग पाङ्ग्राले गुड्ने, पखेटाले उड्ने, फलाममाथि दाैड्ने, पानीमाथि पाैड्ने सबै सवारी साधनका टिकट उपलब्ध छन् ।

तपाईं राजनीतिक पेशाकर्मी हुनुहुन्छ ? तपाईंलाई चुनावमा उठ्ने टिकट चाहिएकाे हाे ? त्याे पनि सस्तो, सुलभ र भरपर्दाे ? तपाईंको आफ्नै पार्टीले पत्याएन ? दस्तुर धेरै बुझाउनु पर्ने भाे ? दस्तुरले पनि नहुने रे ? कि चाकडी पुगेन ? नाे प्राेबाेलम ! हामीलाई सम्झिनुहाेस् । उम्मेद लिएर आउनुहाेस् । हामी दिलाउँछाैं तपाईंलाई उम्मेदवारीको टिकट । टिकट लैजानुहाेस् । लड्नुहाेस् चुनाव ।

टिकट दिलाउने हाम्राे काम हाे । चाहनुहुन्छ भने चुनाव चिन्ह पनि दिलाइदिउँला । राेजे अनुसारकै मिलाइदिउँला । सहयाेगकाे कुरा गर्नुहुन्छ भने हाम्राे सेवा केन्द्रले तपाईंलाई निराश गर्दैन । तपाईंलाई भाषण गर्नका लागि भाडाका जनता उपलब्ध गराइदिन सक्छाैं । सम्झाैता अनुसार दिनरात डट्ने कार्यकर्ता खटाइदिन सक्छाैं । तपाईंकै खर्चमा हामीले पाउने सर्तमा रक्सीका बाेतल र राँगाका टाउका लडाइदिन सक्छाैं । भाषण गर्न आउदैन भने नआत्तिनुहाेस् । त्याे पनि हामी बनाइदिन सक्छौं । आवश्यक परे फिजिकल र अनलाइन माध्यमबाट पढाइदिन सक्छाैं । मतपत्रकाे परिणाम नआउञ्जेल तपाइँको पक्षमा माहाेल अडाइदिन सक्छौं । जितिहाल्नु भाे भने सत्तामा चढाइदिन सक्छाैं । सत्तामा मेसाे नमिले भत्ताले ढडाइदिन सक्छौं ।

हाम्रा प्यारा ग्राहक वर्गमा एउटै मात्रै अनुराेध छ । हामी तपाईंलाई ज्यान दिएर सेवा गर्न तयार छाैं । हाम्राे सेवाका बारेमा हामीसितै कुरा गर्नुहाेला । यदि हाम्राे टेवा र सेवामा रहेर दायाँबायाँ गर्न खाेज्नु भयाे भने हामी मादुराे , राेबर्ट मुगाबे , बशर अल असद बनाइदिन सक्छाैं । जुनसुकै बेला लडाइदिन सक्छौं ।

हाम्रा प्यारा देवता, हाम्रा मालिक, हाम्रा अन्नदाता, प्राणदाता ! यति एउटा सामान्य कुरा तपाईं जान्नुहाेस् । हामीले भनेकाे हर कुरा मान्नुहाेस् त हामी भन्दै भन्दैनाैं । हामीलाई सबै किसिमका देशी विदेशी शक्तिको साथ, सहयाेग र समर्थन छ । तपाईंका पार्टी फुटाउनु परे या जुटाउनु परेमा अवश्य सम्झिनुहाेला । हामी सेवामा तत्पर छाैं ।

प्यारा सेवाग्राही ! टिकट बिक्री सेवा केन्द्रले तपाईंको हार्दिक स्वागत गर्दछ । तपाईंको सेवा गर्न पाउनुलाई हामी हाम्राे कर्तव्य ठान्दछाैं । सिमित टिकटहरूमा असिमित माग भइरहेकाे हुँदा आजै आफ्नो प्रति सुरक्षित राख्नुहाेस् । हामी भरपर्दाे सेवा उपलब्ध गराउने बाचा गर्दछौं । टिकट बिक्री सेवा केन्द्रप्रति ढुक्क हुनुहाेस् । सासमात्रै बाँकी रहेका लासहरूसँग के अपेक्षा गर्नुहुन्छ ? हामी तपाईंहरूकाे आशलाई निराश हुन दिने छैनाैं ।

तपाईंको सेवाकाे प्रतीक्षामा

टिकट बिक्री सेवा केन्द्र
अस्तव्यस्त चाेक, गुमनाम लपाने ।

०००
मिति २०८२।१०।०५
रेसुङ्गा न पा २ , गुल्मी