नेपाली हास्यव्यङ्ग्य अनलाइन पत्रिका

हो भोट यो सङ्कट टाल्नलाई
हो भोट यो फोहर फाल्नलाई
हो देशको यो रथ हाँक्नलाई
हाँकिस् र के भोट दिऊँ तँलाई ?

न हेरिए सङ्कटका अवस्था
न फेरिए दुर्गति, दुर्व्यवस्था
बढ्दै गए सङ्कट भोग्नलाई
जानी बुझी भोट दिऊँ तँलाई ?

गाई दुही पात्र ठुलै सजाई
दिऊँ सधै दूध म सर्पलाई ?
तँ सर्प तेरै म गरूँ भलाई ?
के सोचले भोट दिऊँ तँलाई ?

सधै स्वयंले सुख भोग्नलाई
आफ्नै दुनो ढल्छ भनी समाई
बस्छस् चिनेँ, हुन्न भने भलाई
केनिम्ति भन् भोट दिने तँलाई ?

सदैव लड्छस् धन लुट्नलाई
विवाद रच्छस् पद थाम्नलाई
गर्छस् गुलामी टिकिराख्नलाई
यै गर्न भन् भोट दिने तँलाई ?

तैंले गरिस् त्याग कतै मिलाई
सधै भनिस् गर्न भनी मलाई
कुर्सी तँलाई दिइराख्नलाई
मैले सधै भोट दिऊँ तँलाई ?

स्थायी गराइस् पद मानलाई
साथी बनाइस् बदनामलाई
प्रयत्न तेरो धन थप्नलाई
मैले दिने भोट सधै तँलाई ?

नलड् स्वयं उठ् गरिखानलाई
नबन् कसैका भरिया, सलाई
छोडेर नोक्सान समा भलाई
बाटो बना सुन्दर हिड्नलाई ।

मान्छे बनी आइज माग्नलाई
सच्याउँदै जा दल, आफुलाई
तँ देशको बन् गरिछोड्नलाई
र बल्ल पो भोट दिने तँलाई ।

भेट्दै नभेटी र यता नआई
यता उता माइकमा कराई
हल्ला गरेकै भरमा रमाई
दिन्थें त्यसै भोट कहाँ तँलाई ?

पाल्पा, हाल काठमाण्डौं