अर्जुन पराजुलीआगो ताप्न
जनताको आँखामा छारो हाल्नु छ ! छारो नहाले देख्छन् आँखाले लाइटर र सलाई बोकेर संसदमा पाल्नु छ ! निकै जाडो हुन्छ भन्छन् आउने माघमा आगो ताप्न पेट्रोल छर्केर- फेरि एकचोटि संसद बाल्नु छ !!
सप्रेको जति मैले
बिग्रेको जति तैँले भनेर भन्नु छ !
खेदोको स्काभेटर चलाउनु छ
खाल्टो खन्नु छ !
खाल्टो किन भनेर कसैले सोध्यो भने
समृद्धि ल्याउन भन्नु छ !
कसम नयाँ खानु छ
झुटको खेती गर्नु छ !
मल हालेर सप्रिँदैन झुटको बोट
बोटको वरिपरि भ्रम छर्नु छ !
आफूले गरेको भ्रष्टाचारलाई
अरुले गरेको भनेर देखाउनु छ !
यता बनाएकै छैन
उता उदघाटन भएको समाचार लेखाउनु छ !
घटीमा पनि
दुई सय किलो फूलको माला पहिरिनु छ !
माला पहिरन
कहिले यता कहिले उता गइरहनु छ !
नेता मात्रै भएर पुग्दैन फेरि
राजनेता भइरहनु छ !
एउटा हातले देशको झण्डा उचाल्नु छ !
अर्को हातले-
जनताको आँखामा छारो हाल्नु छ !
छारो नहाले देख्छन् आँखाले
लाइटर र सलाई बोकेर संसदमा पाल्नु छ !
निकै जाडो हुन्छ भन्छन् आउने माघमा
आगो ताप्न पेट्रोल छर्केर-
फेरि एकचोटि संसद बाल्नु छ !!
०००
हाल, अस्ट्रेलिया
