प्रभा पाेखरेलसाँढेको रजाइँ
बस्तीहरू निरास छन् झोपडीहरू रूँदैछन् बाली नाली खडेरीले खाएर ढुकुटी रित्तै छ यस्तो रजाइँ गर्न पल्केर साँढेहरू आजकल उम्लेका छन् उन्मत्त बेलगाम भएका छन् ।
प्रभा पोखरेल
साँढेको कहरमा
कयौँ रहर
ओझेल परेर
सन्नाटा छाएको छ,
कानूनी रवैयाको
पासोमा परेर
यात्राकै यात्री
धरापमा पर्दा
रमिते बनेका मुकदर्शक
साँढेहरू
आलिसान दरवारमा
देश लुट्न तरवार
उध्याइरहेका छन्,
कुर्सीमा जरो गाड्न
बनेको जालो
डुहुरे मुसाले मात्र हैन
कतै व्वाँसा छिरेर
भाड्लान् भन्ने
डरले
ठाउँ ठाउँमा
तोप गोलासहित
कोही साँढे
पहरा दिन व्यस्त छन्,
भान्से र भातकराउ
नाका नाका धाएर
चाकडीको चिल्लो घस्तै
खुट्टाको जल शिरमा चढाएर
भक्ति धारा जपिरहँदा
किर्नाझैँ
भुँडीवाल साँढेहरू
बाक्लो शैयामा पल्टेर
सपनाको
मिठो देश लुट्ने
उर्लदो उत्कण्ठा समालेर
हुक्काको सर्कोमा
चर्को धुँवासँगै
रवाफका कवाफ
फालिरहेछन् ।
यस्ता विना
चेतका मिचाहा
साँढेको भाडँभैलोमा
थिचिएर
बाच्छा बाच्छीको
हालत समाल्न नसक्दा
बस्तीहरू निरास छन्
झोपडीहरू रूँदैछन्
बाली नाली खडेरीले
खाएर
ढुकुटी रित्तै छ
यस्तो रजाइँ गर्न पल्केर
साँढेहरू
आजकल उम्लेका छन्
उन्मत्त बेलगाम भएका छन् ।
०००
नर्थ क्यारोलाइना, अमेरिका
